EKINTU ekibi muno kibaireho. Yohana Omubatizi amazire kwitwa. Herodiya, muka omukama akaba atakumugonza. Kandi akasobora kuletera omukama kuragira Yohana kutemwaho omutwe.

Yesu bw’ahurra binu, asalirwa muno. Ayehuguraho kuba wenka. Baitu abantu bamusangayo. Yesu obwarora ekitebe ky’abantu, abakwatirwa embabazi. Abatebeza ha Bukama bwa Ruhanga, kandi akiza abarwaire babo.

Rwebagyo oru abageswa be baija haluwe kandi bagamba: ‘Obwire bugenzere, kandi ekicweka kinu tikirumu bantu. Ragira abantu bagende begurre ebyokulya mubyaro haihi.’

Yesu abagarukamu: ‘Tikikwetagisa bo kugenda. Inywe mubahe ekyokulya.’ Ahindukira Firipo amukaguza ati: ‘Nitusobora kugura nkaha ebyokulya ebikumara kuliisa abantu banu boona?’

Firipo agarukamu ati: ‘Kiija kutwara sente nyingi muno kugura eby’okulya ebikumara nukwo buli omu atungeho kake.’ Andereya nawe agamba ati: ‘Onu omwojo ahimbiire eby’okulya, aine emigaati etaano kandi n’encu ibiri. Baitu binu tibirukwija kumara abantu banu boona.’

Yesu agamba: ‘Gambira abantu baikarre hansi ha bunyansi.’ Aho Yesu asiima Ruhanga habw’ebyokulya kandi atandika kubicwamucwamu. Hanyuma abegeswa be bagabira abantu boona emigaati n’encu. Hakaba haroho abasaija 5,000 kandi otaireho enkumi n’enkumi z’abakazi n’abaana. Boona balya kuhikya obu baigusire. Kandi abegeswa obu basoroize obukunkumuka bwijuza ebigega12!

Yesu hati agamba abegeswa be kugenda mu ryato nukwo bacwanganize Enyanja ya Galilaya. Mu kiro omuyaga gw’amaani gwaija, kandi ebigonzi bitwara eryato hanu na hali. Abegeswa batiina muno. Hagati y’ekiro, barora omuntu naija halibo ha maizi. Bakunga n’okutiina, habw’okuba batetegereze eki bakaba nibarora.

Yesu agamba: ‘Mutatiina, niinye!’ Nabwo batakikirize. Hati Petero agamba ati: ‘Mali obworaba niiwe, Mukama, ngambira nanye ndubate h’amaizi nyije h’oli.’ Yesu amugarukamu ati: ‘Ija!’ Kandi Petero aruga mu ryato kandi arubatira h’amaizi! Baitu hanyuma atiina kandi atandika kudikira, baitu Yesu amujuna.

Hanyumaho Yesu ayeyongera aliisa enkumi n’enkumi z’abantu. Murundi gunu akakozesa emigati etaano n’obucu buke. Nabyo bimara boona. Tikiri kyamahano nkoku Yesu arukufayo h’abantu? Obu aliba nalema nk’Omukama atairweho Ruhanga titulyeralikirra ekintu kyoona!