CINDU cine cakutengusya cigambile kutendekwa kwene. Yohane M’batisa agambile kum’wulaga kwene. Helodiya, ŵamkwawo mwenye, nganamnonyelaga Yohane. Ni ŵatendekasisye mwenye kuti amkate Yohane mtwe.

Yesu papikene yeleyi, akuŵa jwacanasa mnope. Akwawula ku malo kwajika. Nambo ŵandu akumkuya. Yesu pakwawona ŵandu ŵala akwatendela canasa. M’yoyo jwalakwe akwasalila yakwamba ucimwene wa Mlungu, soni akwaposya ŵakulwala.

Ligulolyo ŵakulijiganya ŵakwe akwisa kwa jwalakwe nikumsalila kuti: ‘Kusaku kukuswa, soni akuno kuli kwakutalikangana ni ŵandu. Ŵasalile ŵanduŵa kuti akalisumile yakulya m’misi jakuŵandicila.’

Yesu akwajanga kuti: ‘Jemanjaji ngakusosekwa kutyoka, jemanja ni ŵamkusosekwa kwapa yakulya kuti alye.’ Kaneko Yesu akumlola Filipo, nikum’wusya kuti: ‘Ana mpaka tusume kwapi yakulya yakwanila ŵandu wosopeŵa?’

Filipo akwanga kuti: ‘Cipasosekwe mbiya syapawinji kuti tusume yakulya yakwanila, yakuti jwalijose agambe kulya panandi.’ Kaneko Andileya akuŵeceta kuti: ‘Mnyamata aju jwajigele yakulya yetu, akwete mikate msano ni somba siŵili. Nambo yeleyi ngaŵa mkwakwanila ŵandu wosopeŵa.’

Yesu akwasalila kuti: ‘Mwasalile ŵanduwo kuti atame pamanyasi.’ Kaneko jwalakwe akuyamicila Mlungu ligongo lya yakulyayo, ni akuyigaŵa yakulyayo mapisimapisi. Kaneko, ŵakulijiganya ŵala akwagaŵila mikate ni somba ŵandu wosope. Apali acalume 5,000 soni acakongwe masawusande gejinji ni ŵanace ŵakwe. Wosopewo akulya ni kwikuta. M’yoyo ŵakulijiganya pakulokotela makombo, pakusimanikwa ngalala 12 syegumbale!

Sambano Yesu akwasalila ŵakulijiganya ŵakwe kuti akwele liboti kuti ajomboce nyasa ja Galilaya. Ndaŵi ja cilo cimbungo camacili cikupuga, ni matumbela gakulituta libotilyo aku nakuku. Ŵakulijiganyawo wakamwile mnope woga. Kaneko pasikati cilo, akum’wona mundu jwine ali mkwenda penani pamesi kwawula kwali jemanjajo. Jemanjajo akugumila mwawoga, ligongo ngakumanyilila yakuyiwonayo.

Yesu akuŵeceta kuti: ‘Akajogopa, ndili une.’ Nambo jemanjajo ngakukulupililape. Sambano Petulo akuŵeceta kuti: Naga ali kwene wawojo ambuje, asalile kuti njende pacanya pamesi kwawula kwali wawojoko.’ Yesu akwanga kuti: ‘Yikani!’ Sambano Petulo akwima ni kwendaga pacanya pamesipo! Kaneko jwalakwe akutenda woga ni akutanda kutiŵila, nambo Yesu akumkulupusya.

Kaneko, Yesu akulisyasoni macilamacila gejinji ga ŵandu. Pandaŵi ajino jwalakwe akwalisya ni mikate msano ni jiŵili ni tusomba twakuŵalanjika. Pakuŵasoni yakulya yakwanila kwa wosope. Ana yakutenda Yesu pakwasamalila ŵandu ngaŵa yakusangalasya? Pacacilamulilaga mpela mwenye jwa Mlungu, ngasitudandawula ni cindu cilicose!