TSʼOʼOK u beetaʼal upʼéel baʼal jach kʼaas. Táant u kíimsaʼal Juan Bautistaeʼ. Jach pʼektaʼan kaʼach tumen Herodías, u yatan le reyoʼ. Tu yoksaj tu pool le rey ka u túuxt kúul xotʼbil u pool Juanoʼ.

Ka tu yojéeltaj Jesús lelaʼ, jach okʼom óolchaji. Ka túun bin tu juunal tiʼ upʼéel kúuchil tuʼux mix máak yaniʼ. Baʼaleʼ bin xan le máakoʼob tu paachoʼ. Ka ilaʼaboʼob tumen Jesuseʼ, letiʼeʼ tu chʼaʼaj óotsilil tiʼob. Le beetikeʼ, tu tsikbaltajtiʼob u reino Dios, yéetel tu tsʼakaj le kʼojaʼanoʼoboʼ.

Tiʼe súutukoʼ taal u j-kaambaloʼob yiknaleʼ ka tiaʼaloʼobtiʼ: Táan u yáakʼabtal, tsʼoʼoleʼ mix máak kajaʼan wayeʼ. Aʼal tiʼe máakoʼob ka xiʼik u man baʼal u jaantoʼob teʼ kaajoʼob yaan naatsʼoʼ.

Jesuseʼ tu núukaj: Maʼ kʼaʼabéet u binoʼobiʼ, tsʼáaʼex baʼal u jaantoʼob. Jesús túuneʼ tu kʼáataj tiʼ Felipe: ¿Tuʼux jeʼel k-manik janal utiaʼal tuláakal le máakoʼobaʼ?

Felipeiʼ tu núukaj: Jach yaʼab taakʼin jeʼel u tojoltik utiaʼal ka manaʼak upʼíit janal utiaʼal tʼoxbil tiʼ tuláakal le máakoʼobaʼ. Andrés túuneʼ tiaʼalaj: Tiʼe chan xiʼipalaʼ yaan cinco waajoʼob yéetel kaʼatúul kay. Baʼaleʼ maʼatan u chúukpajal utiaʼal tuláakal le máakoʼobaʼ.

Jesús túuneʼ tiaʼalaj: Aʼaleʼex tiʼe máakoʼob ka kulakoʼob yóokʼol le xíiwoʼoboʼ. Ka tsʼoʼokeʼ tu tsʼáaj u nib óolalil tiʼ Dios yoʼolal le janaloʼ, ka joʼopʼ u xeʼexetʼik. Le j-kaambaloʼoboʼ tu tʼoxoʼob le waaj yéetel le kay tiʼ tuláakal le máakoʼoboʼ. Yaan 5.000 xiiboʼob bey xan yaʼabach koʼoleloʼob yéetel paalaliʼ. Tuláakal jaanoʼob tak ka naʼajchajoʼob. ¡Le j-kaambaloʼob ka tu moloʼob u yalab le janaloʼ, chuʼup doce xaakoʼob yéetel!

Ka tsʼoʼokeʼ Jesuseʼ tiaʼalaj tiʼ u j-kaambaloʼob ka naʼakkoʼob tiʼ upʼéel cheem yoʼolal u kʼáatloʼob tu jaʼi Galilea. Tiʼe áakʼab túunoʼ káaj upʼéel kʼaʼamkach iikʼ, le cheemoʼ suʼusutaʼab tumen le jaʼoʼ. Le j-kaambaloʼoboʼ jach sajakchajoʼob. Táan u taal u sáastaleʼ, tu yiloʼob táan u taal u xíimbal utúul máak yóokʼol le jaʼ tu tojiloʼoboʼ. Letiʼobeʼ sajakchajoʼobeʼ ka joʼopʼ u yaawtoʼob, tumen maʼ u yojloʼob máax le ku taal tu yiknaloʼoboʼ.

Jesuseʼ tiaʼalaj: ¡Teen, Jesús! Maʼ sajaktaleʼex; kex beyoʼ maʼ tu jáan kʼaj óoltoʼobiʼ. Le beetik Pedroeʼ tiaʼalaj: Yuumtsil, wa teecheʼ, aʼalten ka taalaken xíimbalil tak ta wiknal. Jesuseʼ tu núukaj: ¡Koʼoten! ¡Pedro túuneʼ eʼemeʼ ka joʼopʼ u xíimbal yóokʼol le jaʼoʼ! Chéen baʼaleʼ sajakchajeʼ ka joʼopʼ u búulul, baʼaleʼ kʼuch Jesús áantik.

Ka máan kʼiineʼ, Jesuseʼ tu kaʼa tséentaj yaʼabach máakoʼob chéen yéetel siete waaj yéetel upʼíit kayoʼob. Ka chúukpaj utiaʼal u janal tuláakal le máakoʼoboʼ. ¡Jach ku líiʼsik k-óol k-ilik bix úuchik u tsʼáaik Jesús le baʼax kʼaʼabéet tiʼe máakoʼoboʼ! ¡Ken yanakoʼon yáanal u reinoeʼ, mix baʼal kun chiʼichnakkúuntkoʼon!