ADKINTUFINGE Jesu tañi lipang mu ñi pangkontükuniefiel ti pichi wentru (püchü kampu). Peafuymi kidu duamniefi ti pu pichikeche. Tati pu wentru adkintulelu fey tañi pu apostol. ¿Kimimi chem feypimekeeyew Jesu?

Jesu ka tañi pu apostol engün we akutuy miawma kamapu mew. Rüpü mew tati pu apostol yafkawi engün. Feymu lle, akutulu engün Jesu ramtufi engün: ‘¿Chem dungu am yafkawimün rüpü mew?’ Jesu rüf kimi ñi yafkawkülen engün. Welu ramtufi tati pu apostol ñi kimal chem ñi feypial engün.

Tati pu apostol chem feypilay engün no rume, kidu engün am yafkawkülelu ta rüpü mew iney wünenkülen kidu engün mew. Kiñeke ayüy (küpa) ñi doy falin-ngeal ta kakelu mu. ¿Chumngechi feypieyew Jesu ñi kümenon tañi illutukeal tañi wünenküleal?

Jesu mütrümfi kiñe pichi wentru, ka elkünufi ñi adkiñ mew kom engün mew. Feymew feypifi tañi pu inanieetew: ‘Ayülen tami küme kimal tüfa: Kakünutunolmün, ka pichikeche trokiwkülenolmün, chumkawnorume konpulayaymün ta Ngünechen ñi reyno mew. Tati doy wünelkülelu tati reyno mew, fey müley tüfachi pichiche reke.’ ¿Eymi kimimi chumngelu (chemu) feypi Jesu tüfa?

Tati pu doy pichikalu rakiduamkelayngün ñi doy wünenküleal ka doy falin-ngeal ta kakelu pu che mew. Feymu lle tati pu apostol müley ñi kimal ñi pichiche reke ngeal, ka yafkawnoal ñi doy wünenküleal ka doy falin-ngeal.

Ka rupachi mu, Jesu pengeli chumten ñi duamniefiel tati pu pichikeche. Kiñeke küyen wüla, kiñeke che küpali tañi pu yall ñi pemeafiel Jesu. Tati pu apostol küpa kiñe püle entufi. Welu Jesu feypieyew: ‘Eluñmafimün tati pichikeche ñi küpayael iñche mew, ka katrütukefilmün. Ngünechen ñi reyno koneltuley tüfachi pichikeche reke femngelu.’ Fey pankofi (fültükupafi) ti pichikeche, fey elufi kümelkan. ¡Müna kümey taiñ kimal Jesu ñi piwkeyefiel tati pu pichikeche! ¿feyngelay?