MONA Yesu nakumbatila umwana umunono. Nga fintu ulemona, Yesu alitemenwe abana abanono. Abaume abalemulolesha, basambi bakwe. Cinshi Yesu alebeba? Natumone.

Yesu na batumwa bakwe e lyo babwelele fye pa lwendo ulutali. Mu nshila, abatumwa bakwe baletaalikana. E ico ilyo bafikile, Yesu abepwishe ati: ‘Finshi mwacilataalikanapo mu nshila?’ Nangu Yesu aipwishe, alishibe ico baletaalikanapo. Lelo alefwaya fye ukwishiba nga ca kuti abasambi bakwe balamweba.

Abatumwa bakwe tabayaswike pantu baletaalikana pa wali umukalamba pali bonse. Abatumwa bambi balefwaya ukuba abacindama sana ukucila bambi. Bushe Yesu ali no kucita shani pa kubeba ukuti tabalingile ukufwaya ukucindama sana pali bonse?

Aitile uyu umwaice no kumwiminika pa ntanshi yabo. Lyena aebele abatumwa bakwe ati: ‘Ndefwaya mwishibe ukuti nga tamwalwike no kuba nga abana abanono, tamwakengile mu bufumu bwa kwa Lesa. Umukalamba mu bufumu ni ulya uwaba nga uyu umwana umunono.’ Bushe walishiba ico Yesu alandiile ifyo?

Abaice tababika amano ku kuba abakalamba nelyo ukucindama ukucila abanabo. E ico abatumwa balingile ukuba nga bana abanono, tabalingile ukulataalikana pa ufwile ukuba umukalamba nelyo uwacindama.

Kwali inshita na shimbi ilyo Yesu alangile ukuti alitemwa abana abanono. Pa numa ya myeshi iinono, abantu batwele abana kuli Yesu. Abasambi bakwe bafwaile ukubatamfya. Lelo Yesu aebele abatumwa bakwe ati: ‘Lekeni abana banono bese kuli ine, mwibakaanya, pantu ubufumu bwa kwa Lesa bwa bantu ababa nga abana.’ Lyena Yesu afukatile abana no kubapaala. Bushe taumfwa bwino ukwishiba ukuti Yesu alitemwa abana abanono?