Stori 94: Hem i Lavem Ol Pikinini
LONG pija ya, Jisas i stap putum han blong hem i goraon long wan smol boe. Yu luksave nomo se Jisas i rili laekem ol pikinini. Ol man we oli stap lukluk Jisas, hemia ol aposol blong hem. ?Jisas i stap talem wanem long olgeta? Bambae yumi luk.
Jisas mo ol aposol blong hem oli jes kambak long wan longfala trip. Long rod, ol aposol oli stap raorao. Long en blong trip ya, Jisas i askem long olgeta se: ‘?Wanem samting ya we yufala i stap rao from long rod?’ Jisas i save finis wanem samting oli stap rao from. Be hem i askem kwestin ya blong luk sipos ol aposol blong hem bambae oli talem long hem.
Be olgeta oli no save ansa long hem, from we long rod, oli stap rao se hu long olgeta i hae moa. Sam aposol oli wantem kam ol man we oli impoten moa long ol narafala. ?Jisas i talem wanem blong soem se i no stret we oli wantem kam hae moa long ol narafala?
Hem i singaot wan smol boe i kam long hem, i putum hem i stanap long medel blong olgeta. Nao hem i talem long ol disaepol blong hem se: ‘Tru mi talem long yufala, sipos yufala i no jenisim fasin blong yufala blong kam olsem pikinini, bambae yufala i no save kam insaed long kingdom blong God. Man we i kam olsem pikinini, hem bambae i hae moa long kingdom blong God.’ ?From wanem Jisas i talem olsem?
Hem i talem olsem from we ol smol pikinini oli no gat tingting blong kam hae moa no impoten moa i bitim ol narafala. Ale, ol aposol oli mas tekem fasin ya blong ol pikinini, oli no mas raorao se hu nao i moa hae no hu i moa impoten.
I gat sam narafala taem bakegen we Jisas i soem se hem i laekem tumas ol pikinini. Sam manis biaen, sam man oli karem ol pikinini blong olgeta oli kam long Jisas. Be ol aposol oli traem blokem olgeta. Jisas i talem long ol aposol ya se: ‘Yufala i no blokem ol pikinini ya. Yufala i letem olgeta oli kam long mi, from we ol pikinini tu oli gat raet wetem ol man long kingdom blong God.’ Nao hem i putum han blong hem i goraon long ol pikinini ya, mo i blesem olgeta. I gud tumas blong save se Jisas i lavem ol pikinini.
Matiu 18:1-4; 19:13-15; Mak 9:33-37; 10:13-16.
Ol Kwestin
- ?Ol aposol oli stap raorao from wanem samting taem oli stap mekem longfala trip blong gohom?
- ?From wanem Jisas i singaot wan smol pikinini i kam stanap long medel blong ol aposol?
- ?Long wanem fasin ol aposol oli mas kam olsem ol pikinini?
- ?Sam manis biaen, olsem wanem Jisas i soem se hem i lavem ol pikinini?
Sam narafala kwestin
- Ridim Matiu 18:1-4.
?From wanem Jisas i yusum ol pijatok blong tijim ol man? (Mat. 13:34, 36; Mak 4:33, 34)
- Ridim Matiu 19:13-15.
?Wanem ol fasin blong pikinini we yumi mas folem sipos yumi wantem kasem ol blesing blong Kingdom? (Sam 25:9; 138:6; 1 Kor. 14:20)
- Ridim Mak 9:33-37.
?Wanem tijing we Jisas i givim long ol disaepol blong hem long saed blong fasin blong wantem kam hae moa long ol narafala? (Mak 9:35; Mat. 20:25, 26; Gal. 6:3; Fil. 2:5-8, NW)
- Ridim Mak 10:13-16.
?Wanem i soemaot se ol man oli no fraet blong kam storian wetem Jisas? ?Ol Kristin elda oli save lanem wanem from fasin ya blong hem? (Mak 6:30-34; Fil 2:1-4; 1 Tim. 4:12)
