Abahüdaguni 94

Hínsiñetiñu irahüñü lun

ARIHABEI Hesusu ya lau larüna óuburei irahü le. Gayarati barihin teni lan houn irahüñü. Wügüriña ha barihibaña lani apostolugu. Subuditi san bun ka lan lariñagunbei Hesusu houn?

Hesusu hama lani apostolugu hachülüraña lídangiñe aban wéiyaasu migifeti. Ǘmada asigenehatiñu buga apostolugu. Ligíati, lárigiñe wéiyaasu aba lálügüdüniña Hesusu: ‘ka san buga uagu hasigenehan ǘmada?’ Subudi lumuti Hesusu ka lan buga hasigenehabei. Aba lálügüdüniña lun larihin anhein hariñagubei lubéi lun.

Aba herederun apostolugu maniñu, ladüga hasigenehaña ǘmada luagu ka lan hádangiñe wéirigutimabei. Fiú hádangiñe busentiñu lun wéirigutima hamá hawéi ha híbiri. Ida lubati lariñaguni Hesusu houn mabuindun lan lun habusenrun wéirigu hamá?

Aba lanügün aban irahü, aba líchuguni hagibugiñe. Aba lariñagun houn: ‘Ninarün hau luagu anhaün lan masansirun ani miabin lun hítaradun kei irahüñü, mebelubadün lidoun larúeihan Bungiu. Le ítarabei kei aban irahü ligía wéirigutimabei lidan arúeihani le siélubei.’ Subuditi bun ka lan uagu lariñagei katei le?

Masaminaruntiñu irahüñü lun wéirigu hama hawéi ha híbiri. Ligíati mosu lubei hafurendeirun apostolugu lun ítarameme hamá kei irahüñü lidan igaburi le, lun mageindagun hamá luagu uéiriguni.

Lidan burí amu ókaasion arufuda lumuti giñe Hesusu lueirin hínsiñe irahüñü lun. Fiú hati lárigiñe aba hanügüniñu gürigia harahüñü lun harihini Hesusu. Aba houchun lani apostolugu lun hadisedagüniñu. Gama lumoun aba lariñagun Hesusu houn: ‘Ígira humá lun hayabin irahüñü numoun, mamahara humá, ladüga ha ítarabaña kei irahüñü, hagía lílanabaña larúeihan Bungiu.’ Ábati lóuburuniñu ani biní laña. Ma buiti lasubudirunua hínsiñe hamá irahüñü lun Hesusu!

Matéu 18:1-4; 19:13-15; Márükosu 9:33-37; 10:13-16.