TALA Yesu kanakangayika kanuke mu kondo yenyi. Yena muhasa kumona ngwo chamwenemwene Yesu kakuzanga chinji twanuke. Malunga waze anamutale kali apostolo jenyi. Yika Yesu anaalweze? Tutalenu.

Yesu ni apostolo jenyi te machiheta mu umwe wenyi usuku uze alingile. Mu wenyi wacho apostolo jenyi kanakalizwelesa. Kashika muze te haheta, Yesu yaahula ngwenyi: ‘Yika yenwe te nunazwelela mu jila?’ Chamwenemwene, Yesu te kananyingika yize ayo te anazwelela. Alioze iye yalinga chihula hanga amone yize apostolo te mamba.

Apostolo kakamukumbulwile, mumu ayo te mu jila kanazwele hakutwala kuli yoze te munene hakachi ko. Amwe apostolo yazanga kupwa alemu chinji kuhianyisa akwo. Yika Yesu anakalinga hanga aalweze ngwo hi chipema ko kuzanga kupwa mulemu?

Iye yasanyika umwe kanuke wa lunga, yamusa kulutwe lia ayo eswe. Mba yamba kuli tumbaji twenyi ngweyi: ‘Yami ngunazange hanga yenwe nunyingike ngwo, nyi nwalumukine hanga nupwe ngwe kanuke yono, kunuchi kanjila mu wanangana wa Zambi. Mutu munene mu wanangana kali yoze malipwisa ngwe kanuke yono.’ Yena unanyingika mumu liaka Yesu ambile chocho?

Mumu twanuke keshi kufupa kulipwisa anene hanji atu alemu kuhianyisa akwo ka. Ha chino apostolo te chaatamba kulilongesa hanga apwe ngwe twenuke, hi kuzwela ko hakutwala kuli iya yoze munene hanji mulemu mukachi ko.

Ha mashimbu akwo, Yesu yasolola nawa ngwo iye te kakuzanga chinji twanuke. Kulutwe lia amwe tukweji, amwe atu yaneha ana jo hanga atale Yesu. Apostolo yamba kwaakanjisa. Alioze Yesu yamba kuli Apostolo ngwenyi: ‘Echenu twanuke eze kuli yami, kanda nwaakanjisa, mumu wanangana wa Zambi uli wa atu waze apwa ngwe ayo.’ Chocho Yesu yakwata twanuke yaakangayika, nawa yaawahisa. Hi chipema ko kunyingika ngwo Yesu te kakuzanga twanuke?