ITALANOA 94
Dau Lomani Ira na Gone
RAICI Jisu mada ni mokota toka e dua na gonetagane lailai. O rawa ni kaya ni dau kauaitaki ira na lalai. Eratou volekati koya tiko oqori na nona yapositolo. Na cava mada e kaya tiko vei iratou o Jisu? Meda raica mada.
Eratou se qai lesu ga mai o Jisu kei iratou na nona yapositolo ena dua na ilakolako balavu. Eratou a veileti tale tiko ga na yapositolo ena ilakolako oqori. E tarogi iratou o Jisu ni ratou sa yaco yani ina vanua ratou lako tiko kina: ‘Na cava dou a veibataka tiko e gaunisala?’ E kila vinaka tu o Jisu na vu ni nodratou veiba. Ia e taroga ga me kila se ratou na tukuna vua se sega.
Eratou sega ni sauma na yapositolo na nona taro ni ratou a veibataka tiko se o cei me levu cake. E so vei iratou eratou vinakata tiko me ratou raici cake. Ia ena qai vakaraitaka vakacava vei ratou o Jisu ni sega ni dodonu na veika eratou cakava tiko?
E kaciva e dua na gonetagane lailai qai biuti koya e matadratou. Sa qai kaya: ‘Au vinakata mo dou kila na ka oqo, kevaka dou sega ni veisau mo dou vakataki ira na gonelalai, dou na sega ni curu ina matanitu ni Kalou.’ O kila na vuna e kaya kina oqori o Jisu?
Era sega ni dau kauaitaka na gonelalai na rogo se o cei me levu cake. Sa dodonu gona me ratou vulica na yapositolo me ratou vaka na gone ena sala oqo, ratou qai kua ni veibataka na rogo se o cei me levu cake.
Ena so tale ga na gauna e vakaraitaka o Jisu na nona kauaitaki ira na gonelalai. Ena vica na vula tale emuri, era a kau yani vei Jisu e so na gonelalai. Eratou qai via tarova na yapositolo. Sa qai kaya o Jisu: ‘Laivi ira na gonelalai mera lako mai vei au, kua ni tarovi ira, ni sa nodra na matanitu ni Kalou.’ Sa qai keveti ira na gone o Jisu me vosa vakalougatataki ira. Eda marautaka nona dau lomani ira tale ga na gonelalai o Jisu.