TAQSIṬ TIS 94

Iḥemmel arrac imecṭaḥ

TWALAḌ amek yeṭṭef Ɛisa aqcic-​agi amecṭuḥ? Izmeḍ-​it ɣur-​es axaṭer iḥemmel aṭas imecṭaḥ. Irgazen-​agi i t-​issikiden d imceggɛen-​is. D acu akka i sen-​iqqar Ɛisa? D ayen ara nwali tura.

Atan akken kan i d-​yuɣal Ɛisa si lebɛid neţţa d yemceggɛen-​is. Yuɣ lḥal, m’akken i leḥḥun deg webrid, imceggɛen-​agi llan ţmeslayen ɣef yiwet n lḥaǧa. M’akka i d-​wwḍen ihi, yesteqsa-​ten Ɛisa: ‘Ɣef wacu i teţmeslayem deg webrid?’ Di tin n ṣṣeḥ, Ɛisa yeɛlem ɣef wacu i heddṛen. Yebɣa kan ad iwali d acu ara s-​d-​inin.

Lameɛna ḥedd ur d-​inṭiq seg yemceggɛen-​is axaṭer ɛelmen d acu i xedmen. Nudan ad ẓren anwa i d ameqran gar-​asen axaṭer kra bɣan ad ilin d imeqranen ɣef wiyaḍ. Amek ara yexdem Ɛisa iwakken a sen-​issken belli diri-​t uxemmem-​nsen?

Ɛisa yessawel i yiwen n weqcic amecṭuḥ, isbedd-​it di tlemmast-​nsen. Mbeɛd yenna i inelmaden-​is: ‘A wen-​d-​iniɣ tideţ: ma yella ur tbeddlem ara tikli, ur tuɣalem ara am warrac imecṭaḥ, ur tkeččmem ara Tagelda n Ṛebbi. D win ara yuɣalen am weqcic-​agi amecṭuḥ ara yilin d ameqran di Tgelda n Ṛebbi.’ Teẓriḍ ayɣer i sen-​yenna Ɛisa annect-​a?

Axaṭer arrac imecṭaḥ ur ţqelliben ara ad ẓren anwa i d ameqran gar-​asen. Ilaq-​asen ihi i yemceggɛen a ten-ɛanden wala ad ţnaɣen iwakken ad ɛelmen anwa i gmeqqren.

Llant teswiɛin nniḍen anda i d-​issken Ɛisa belli iḥemmel aṭas igurdan. Ɛeddan wagguren, kra n yemdanen wwin-​d arraw-​nsen iwakken ad ẓren Ɛisa. Lameɛna, imceggɛen-​is gezmen-​asen abrid. Ɛisa yenna-​yasen ihi: ‘Anfet-​asen i imecṭaḥ a d-​asen ɣur-​i, ur sen-​qeṭṭɛet ara abrid axaṭer Tagelda n Ṛebbi thegga i wid i ten-​icuban.’ Mbeɛd, Ɛisa iṭṭef-​iten ger ifassen-​is, dɣa iburek-​iten. Ur yethedden ara wul-​nneɣ m’akka i nwala acḥal i gḥemmel Ɛisa imecṭaḥ?

Matta 18:1-4; 19:13-15; Marqus 9:33-37; 10:13-16.