YESU gaw ma kaji hpe ahpum nga ai hpe mada yu mu. Ma kaji ni hpe Yesu teng teng tsaw ra ai ngu nna tsun lu ai. Mada yu nga ai masha ni gaw shi a kasa ni rai ma ai. Yesu gaw shanhte hpe hpa tsun nga ai hpe chye a ni? Anhte yu yu ga.

Yesu hte shi a kasa ni sumtsan lam hkawm ai kaw na, ya sha bai nhtang wa ma ai. Hkrun lam hta e kasa ni shada da ndang kalang hkat nga ma ai. Dai majaw hkrun lam htum ai hte Yesu gaw: ‘Lam kaw e nanhte hpa dang rang hkat ma ni? nga nna san ai. Hpa dang rang hkat ma ai hpe Yesu chye ai. Raitimung shi a kasa ni shi hpe ga htang na ma ai kun nga nna san chyam yu ai.

Kasa ni gaw ga mahtai n jaw ma ai. Hpa majaw nga yang shanhte hta e, kadai wa mahtang grau kaba htum ai nga nna lam e ndang kalang hkat ma ai. Kasa nkau mi gaw kaga ni hta na grau kaba mayu ma ai. Kaba htum mayu ai myit nmai rawng ai lam hpe shanhte chye na hkra Yesu gara hku nna tsun dan na a ta?

Yesu gaw ma kaji langai mi hpe shaga la nna, kasa ni a man e shatsap tawn ai. Bai nna: ‘Ngai teng teng tsun made ga; Nanhte gaw myit galai nna ndai ma kaji zawn nrai wa myit yang gaw, Karai Kasang a mungdan hta galoi mung nshang lu na ma ai. Karai Kasang a mungdan hta kaba htum ai wa gaw, ndai ma kaji zawn tai na wa re,’ nga nna sape ni hpe tsun ai. Yesu hpa majaw ndai zawn tsun dat ai hpe chye a ni?

Ma kaji ni gaw nang grau ai ngai grau ai ngu ai myit n rawng ma ai. Dai majaw kasa ni ma kaji ni zawn byin tai na matu, sharin la ra ai. Ngai she grau ai, ngai she ahkyak madung re, nga nna nmai galaw ai.

Ma kaji ni hpe Yesu tsaw ra ai lam ndai lang sha madun ai nrai. De a hpang shata mi daram hta masha nkau mi shanhte a ma ni hpe Yesu hpang de shaga sa wa ai. Kasa ni gaw n sa na matu hkum shingdang ma ai. Raitimung Yesu gaw: ‘Ma kaji ni hpe ngai hpang de sa wa shangun mu. Shanhte hpe hkum ban shadang mu. Kaning rai nme law Karai Kasang a mungdan gaw, dai zawn re ai masha ni a matu re,’ nga nna kasa ni hpe tsun ai. Bai nna ma kaji ni hpe ahpum tawn nhtawm, shaman chyeju jaw ai. Ma kaji ni hpe Yesu gaw tsaw ra ai lam chye yang anhte kabu shara nre a ni?