Ngewa ya 94: Nĩwendete Syana Nini
KWASISYA Yesũ vaa akumbatĩlye kavĩsĩ na moko make. Nũtonya kwona kana Yesũ nĩwendete syana nini. Andũ asu masyaĩĩsye nĩ atũmwa make. Yesũ emea ata? Ekai twone.
Yesũ na atũmwa make meethĩiwe mavika kuma kyalo kĩasa. Me nzĩanĩ atũmwa asu maĩ na ngananĩo katĩ woo. Kwoou ĩtina wa kyalo Yesũ amakũlya: ‘Mwĩkananĩĩaa ĩũlũ wa kyaũ nzĩanĩ?’ Kwa w’o, Yesũ nĩweesĩ kĩla makananĩaa ĩũlũ wakyo. Ĩndĩ amakũlilye ĩkũlyo yĩu one kana nĩmeũmũtavya.
Ĩndĩ atũmwa mayaamũsũngĩa, kĩtumi nũndũ me nzĩanĩ nĩmakananĩaa ĩũlũ wa nũũ mũnene vyũ katĩ woo. Atũmwa amwe mendaa methĩwe me ma vata kũthonoka ala angĩ. Yesũ amatavisye kwa nzĩa myaũ kana ti ũseo mũndũ kwenda kwĩthĩwa e mũnene vyũ kwĩ ala angĩ?
Yesũ eetie kavĩsĩ kanini, na akaũngamya mbee woo onthe. Na ĩndĩ amea amanyĩw’a make: ‘Nĩw’o nĩngũmwĩa, mwalea kũalyũka mwĩthĩwe ta syana nini, mũikalika nongi ũsumbĩnĩ wa Ngai. Ũla mũnene ũsumbĩnĩ ũsu nĩ ũla ũkethĩwa ta kana kaa kanini.’ We nĩwĩsĩ Yesũ aisye ũu nĩkĩ?
Nũndũ syana nini iyendaa kwĩthĩwa syĩ nene kana syĩ sya vata kwĩ ila ingĩ. Kwoou atũmwa maĩle kwĩmanyĩsya kwĩthĩawa mailyĩ ta syana kwa nzĩa ĩsu na ti kũkananĩaa ĩũlũ wa kwĩthĩwa me anene kana me ma vata.
Na ĩngĩ kwaĩ mavinda angĩ, yĩla Yesũ woonanisye ũndũ wendete syana nini. Myei mĩnini ĩtina, andũ amwe nĩmaetie syana syoo imwone Yesũ. Namo atũmwa matata kũisiĩĩa. Ĩndĩ Yesũ amea: ‘Iekei syana nini syũke kwakwa; mũikaivate: nũndũ ũsumbĩ wa Ngai nĩ wa ala mailyĩ ta isu.’ Na ĩndĩ Yesũ oosa syana isu na aikumbatĩlya mokonĩ make, na aiathima. W’o tyo ũndũ mũseo kũmanya kana Yesũ nĩwendete syana nini?
Mathayo 18:1-4; 19:13-15; Maliko 9:33-37; 10:13-16.
Makũlyo
- Atũmwa me nzĩanĩ masyokete kuma kyalo kĩasa makananĩaa ĩũlũ wa kyaũ?
- Nĩkĩ Yesũ weetie kana kanini na kũkaũngamya katĩkatĩ wa atũmwa?
- Nĩ kwa nzĩa yĩva atũmwa maĩlĩte nĩkwĩmanyĩsya kwĩthĩwa mailyĩ ta twana tũnini?
- Myei mĩnini ĩtina, Yesũ oonanisye ata kana nĩwendete syana?
Makũlyo ma kwongeleela
- Soma Mathayo 18:1-4.
Nĩkĩ Yesũ wamanyĩasya kwa kũtũmĩa ngelekany’o? (Mt. 13:34, 36; Mko. 4:33, 34)
- Soma Mathayo 19:13-15.
Nĩ ndaĩa syĩva sya syana nini twaĩlĩte nĩkũatĩĩa ethĩwa tũkakwata moathimo ma Ũsumbĩ? (Sav. 25:9; 138:6; 1 Ako. 14:20)
- Soma Maliko 9:33-37.
Yesũ amanyĩisye amanyĩw’a make kyaũ ĩũlũ wa kwenda ivĩla sya ũnene? (Mko. 9:35; Mt. 20:25, 26; Aka. 6:3; Avi. 2:5-8)
- Soma Maliko 10:13-16.
Andũ meew’aa mena ũthasyo wĩana ata wa kũthi vala ve Yesũ, namo atumĩa ma kĩkundi matonya kwĩmanyĩsya kyaũ kumana na ngelekany’o yake? (Mko. 6:30-34; Avi. 2:1-4; 1 Tim. 4:12)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Yesũ Nĩwamanyĩisye Ĩũlũ wa Kũthasya Mũtwaano na Kwenda Syana
Woni wa Yesũ ĩũlũ wa syana waĩ kĩvathũkany’o na wa amanyĩw’a make. Nĩkĩ?
