TARORA Jesu haha ahĩmbĩirie kahĩĩ kanini. No wone kũna atĩ Jesu nĩendete twana tũnini. Andũ aya meroreire nĩ atũmwo ake. Jesu aramera atĩa? Ta reke tuone.

No hĩndĩ Jesu na atũmwo ake macoka kuuma rũgendo rũraya. Me njĩra-inĩ atũmwo ake maarĩ na ngarari gatagatĩ-inĩ kao. Thutha wa rũgendo Jesu akĩmoria atĩrĩ: ‘Mũgũkararanagia atĩa mwĩ njĩra-inĩ?’ Kũna-rĩ, Jesu nĩaamenyete ngarari ciao. No ĩndĩ oririe kĩũria kĩu nĩ getha amenye kana atũmwo nĩ mekũmwĩra.

Atũmwo magĩkira ki, tondũ me njĩra-inĩ maarĩ na ngarari cia nũũ mũnene makĩria gatagatĩ-inĩ kao. Atũmwo amwe meendaga monwo maarĩ na igweta gũkĩra arĩa angĩ. Jesu angĩamerire atĩa atĩ gũtiagĩrĩire mũndũ kwĩnenehia gũkĩra arĩa angĩ?

Eetire kahĩĩ kanini, agĩkarũgamia mbere yao othe. Thutha ũcio akĩĩra arutwo ake atĩrĩ: ‘Ngũmwĩra atĩrĩ na ma, mũngĩaga kũgarũrũka mũtuĩke o ta twana, mũtirĩ hingo mũgatonya ũthamaki-inĩ wa Ngai. Mũndũ ũrĩa mũnene thĩinĩ wa ũthamaki nĩ ũrĩa wa kwĩnyihia ta kaana gaka.’ Wee-rĩ, nĩ ũũĩ gĩtũmi kĩa Jesu kuuga ũguo?

Ũhoro wa ma nĩ atĩ, twana tũnini tũtiĩtangaga atĩ nĩ karĩkũ kanene kana ke igweta gũkĩra tũrĩa tũngĩ. Kwoguo atũmwo maagĩrĩire kwĩruta gũtuĩka ta twana tũnini na ti kũhaaranĩra ũnene kana igweta.

Ningĩ nĩ haarĩ mahinda mangĩ, rĩrĩa Jesu onanirie atĩ nĩendete twana tũnini. Mĩeri mĩnyinyi thutha ũcio-rĩ, andũ amwe nĩmaatwarire twana twao tuone Jesu. Nao atũmwo makĩmagirĩrĩria. No ĩndĩ Jesu akĩĩra atũmwo ake ũũ: ‘Rekei twana tũũke kũrĩ niĩ, na tigai gũtũgiria, amu ũthamaki wa Ngai nĩ wa arĩa matariĩ tatuo.’ Jesu agĩcoka agĩtũiyũkia moko-inĩ make, na agĩtũrathima. Na githĩ ti wega kũmenya atĩ Jesu nĩendete twana tũnini?