AKIMONA Yesu papo byo akumbata mwana mucheche wa mulume. Wakonsha kumona’mba kine Yesu watemenwe bingi baana ba bacheche. Banabalume babena kumutala ke batumwa banji. Yesu wibambijilenga’mba ka? Twaya tumone kyo aambilengapo.

Yesu ne batumwa banji po po bafikiletu kufuma pa lwendo lwabo lwalepele. Byo bayilenga mu jishinda, batumwa baendelenga na kwipachika bene na bene. Onkao mambo, byo bafikile, Yesu wibepwizhe’mba: ‘I ki ka kyo mwaji kwipachikanga anwe bene na bene mu jishinda?’ Yesu wayukile kintu kine kyo bepachikilengapo. Pano wibepwizhe kuba’mba amone umvwe kya kuba batumwa bakonsheshe kumubula.

Batumwa kechi bakumbwile ne, mambo mu jishinda bepachikilenga pa kukeba kumona wajinga mukulumpe mwiabo. Batumwa bamo bakebelenga kwikala banema kukila bakwabo. Yesu waubile byepi pa kwibabula’mba kyatama muntu kukeba kwikala mukulumpe kukila bakwabo?

Waichile mwana mucheche ne kumwimika kulutwe yabo bonse. Waambijile baana banji ba bwanga amba: ‘Nakeba namba muyuke kino kishinka. Umvwe ne kuba mwaalula milanguluko yenu ne kwikala nobe mwana mucheche ne, kechi mukatwela mu bufumu bwa Lesa ne. Muntu wikala mukulumpe mu bufumu ke yewa uji nobe uno mwana mucheche.’ Nanchi wayuka ene mambo Yesu o aambijile kino nyi?

Ke na mambo a kuba’mba baana ba bacheche kechi balangulukapo bya kukeba kwikala mukulumpe nangwa kunema kukila bakwabo ne. Onkao mambo, batumwa bafwainwe kufunda kwikala nobe baana mu jino jishinda, ne kuleka kwipachika pa mambo a kukeba kuyuka wajinga mukulumpe nangwa wanemene mwiabo.

Kwajinga ne bimye bikwabo Yesu po amwesheshe’mba baana ba bacheche wibatele bingi muchima. Pa kupitapo bañondo bacheche, bantu bamo baletele baana babo na kumona Yesu. Batumwa bebakainyenga. Bino Yesu waambijile batumwa banji amba: ‘Balekai baana ba bacheche beye kwi amiwa, kwibakanya ne, mambo bufumu bwa Lesa bo bwa bantu ba yenka uno mutundu.’ Kepo Yesu ebatambwile bano baana mu maboko anji ne kwibapesha. Nanchi kechi kyawama kuyuka’mba Yesu watemwa baana ba bacheche nenyi?