ပူ ၉၄
ယ့ၣ်ၡူးအဲၣ်ဖိဒံဖိသၣ်တဖၣ် အဂ့ၢ်
ကွၢ်ယ့ၣ်ၡူးဖိးဟုဖိသၣ်ဖိ လၢတၢ်ဂီၤပူၤန့ၣ်တက့ၢ်. ပစံးလၢ ယ့ၣ်ၡူးအဲၣ်ဖိသၣ်တဖၣ်နီၢ်နီၢ် သ့လီၤ. ပှၤလၢအကွၢ်တၢ်တဖၣ်န့ၣ် မ့ၢ်အတၢ်မၢဖိတဖၣ်လီၤ. ယ့ၣ်ၡူးတဲဘၣ်အဝဲသ့ၣ်မနုၤလဲၣ်. ပကဃုကွၢ်သကိးတက့ၢ်.
ယ့ၣ်ၡူးဒီးအတၢ်မၢဖိတဖၣ် ဟဲက့ၤလၢတၢ်ဒ့ၣ်စၢၤအယံၤ ခဲအံၤဖိလီၤ. လၢကျဲန့ၣ် တၢ်မၢဖိတဖၣ် ဂ့ၢ်လိာ်ဘှီလိာ်တ့ၢ်အသးန့ၣ်လီၤ. လၢတၢ်န့ၣ်အဃိ တုၤအတုၤလၢကျဲကတၢၢ်န့ၣ် ယ့ၣ်ၡူးသံကွၢ်အဝဲသ့ၣ် ‘လၢကျဲန့ၣ် သုဂ့ၢ်လိာ်ဘှီလိာ်သုသးလၢမနုၤလဲၣ်.’ န့ၣ်လီၤ. အဝဲသ့ၣ် ဂ့ၢ်လိာ်အသးလၢမနုၤလဲၣ်န့ၣ် ယ့ၣ်ၡူးသ့ၣ်ညါဝဲလီၤ. ဘၣ်ဆၣ်, မ့ၢ်အတၢ်မၢဖိတဖၣ် ကစံးဆၢအီၤဧါန့ၣ် သံကွၢ်ကွၢ်ဝဲဒၣ်လီၤ.
တၢ်မၢဖိတဖၣ် တစံးဆၢဝဲသ့ၣ်ဘၣ်. ဘၣ်မနုၤအဃိလဲၣ်န့ၣ် လၢကျဲန့ၣ် ဂ့ၢ်လိာ်တ့ၢ်အသးလၢ အဝဲသ့ၣ်အကျါ မတၤကမ့ၢ်အဒိၣ်ကတၢၢ်လဲၣ် အဃိန့ၣ်လီၤ. တၢ်မၢဖိတနီၤန့ၣ် အဲၣ်ဒိးကဲ ပှၤလၢအကါဒိၣ်န့ၢ်ပှၤဂၤလီၤ. ယ့ၣ်ၡူးတဲနၢ်ပၢၢ်အဝဲသ့ၣ်လၢ တကြၢးအိၣ်ဒီး တၢ်သးအိၣ်ကဲအဒိၣ်ကတၢၢ်န့ၣ် ဒ်လဲၣ်.
ယ့ၣ်ၡူးကိးဝဲဖိသၣ်ဖိတဂၤဒီး ဒုးဆၢထၢၣ်အီၤလၢ တၢ်မၢဖိတဖၣ်အမဲာ်ညါလီၤ. ဝံၤဒီး တဲအပျဲၢ်တဖၣ်လၢ ‘ယစံးဘၣ်သုလီၤတံၢ်လီၤဆဲး, သုမ့ၢ်တဆီတလဲသုသးဒီး ကဲထီၣ်ဒ်သိးဖိသၣ်အံၤန့ၣ် သုလဲၤနုာ်ဆူယွၤအဘီမုၢ်ပူၤ တသ့လ့ၤတက့ၤဘၣ်. ဘီမုၢ်အပူၤ ပှၤလၢအကဟဲကဲထီၣ် ပှၤအဒိၣ်ကတၢၢ်န့ၣ် မ့ၢ်ပှၤလၢအဟဲကဲထီၣ်ဒ် ဖိသၣ်အံၤအသိးန့ၣ်လီၤ.’ ဘၣ်မနုၤအဃိ ယ့ၣ်ၡူးဘၣ်တဲဝဲဒ်အံၤလဲၣ်န့ၣ် သုသ့ၣ်ညါဧါ.
ဖိသၣ်ဖိတဖၣ်န့ၣ် တဆိကမိၣ်တၢ်လၢ ကဒိၣ်န့ၢ်ထီန့ၢ်ပှၤဂၤ, အကါကဒိၣ်န့ၢ်ပှၤဂၤ အဂီၢ်ဘၣ်. လၢတၢ်န့ၣ်အဃိ တၢ်မၢဖိတဖၣ်စ့ၢ်ကီး ဒ်သိးကကဲထီၣ်ဝဲဒ်န့ၢ်အဂီၢ်ကဘၣ်မၤလိဝဲလီၤ. တဘၣ်ဂ့ၢ်လိာ်ဝဲသ့ၣ်လၢ ယတၢ်အိၣ်မူအတီၤထီန့ၢ်နၤ, အကါဒိၣ်န့ၢ်နၤဘၣ်န့ၣ်လီၤ.
ယ့ၣ်ၡူးပာ်ဖျါထီၣ်အအဲၣ်ဖိသၣ်တဖၣ်န့ၣ် တမ့ၢ်ထဲအဝဲအံၤတဘျီဘၣ်. တၢ်အံၤအလီၢ်ခံ ယံာ်လါတဝာ်အခါ ပှၤတနီၤဟဲကိး အဖိတဖၣ်ဆူယ့ၣ်ၡူးအအိၣ်န့ၣ်လီၤ. တၢ်မၢဖိတဖၣ်တြီဝဲသ့ၣ် လၢသုတဟဲတဂ့ၤလီၤ. ယ့ၣ်ၡူးစံးဝဲအတၢ်မၢဖိတဖၣ်လၢ ‘ပျဲဖိသၣ်တဖၣ်ကဟဲဆူယအိၣ်တက့ၢ်, တြီအီၤတဂ့ၤ. ဘၣ်မနုၤအဃိလဲၣ်န့ၣ် တၢ်လၢမူခိၣ်အဘီအမုၢ်မ့ၢ် ပှၤလၢအလီၤဂာ်ဒ်သိးအဝဲသ့ၣ်တဖၣ် အဂီၢ်လီၤ.’ ဝံၤဒီး, ဖိးဟုဃာ်ဖိသၣ်တဖၣ်န့ၣ်လီၤ. ဒီးဆိၣ်ဂ့ၤဝဲလီၤ. ပသ့ၣ်ညါလၢ ယ့ၣ်ၡူးအဲၣ်ဖိသၣ်တဖၣ်အဃိ ပသးခုပဝဲတမ့ၢ်ဘၣ်ဧါ.