TALA Yesu obimbakene kingiana-ngiana. Olenda mona vo Yesu wazolanga kikilu yingiana-ngiana. Wantu awaya bekuntalanga i alongoki andi. O Yesu adieyi kekubavovesanga? Yambula twazaya.

Yesu y’alongoki andi mu nkangalu anda batuka. Muna nzila alongoki bafilaziananga e mpaka. Ikuma, vava balwaka o Yesu ubayuvwidi vo: “Nkia mpaka nufididinge muna nzila?” O Yesu wazaya mana bafilaziananga e mpaka. Kansi, ubayuvwidi mu zaya edi bevova.

Alongoki ke bamvutula ko, kadi tantana batantananga muna nzila kana nani osundidi o nene vana bena. Alongoki akaka bazola kuyitundidika vana vena akaka. Aweyi kabasongela Yesu vo okuyitundidika ke diambote ko?

Obokele kingiana-ngiana, unsidi vana bena. Ovovele kw’alongoki andi vo: ‘Nzolele nwazaya wo vo ovo nulembi viluka, yo kituka nze yingiana-ngiana, ke nukota nkutu muna kintinu kia Nzambi ko. Konso on’okuyisakidika nze kingiana-ngiana kiaki, i yandi yuyu osundidi o nene muna kintinu.’ Nga ozeye ekuma Yesu kavovela ediadi?

Yingiana-ngiana ke bevavanga sunda o nene ko ngatu kuyitundidika vana vena akw’au. Ikuma, alongoki bafwana kala nze yingiana-ngiana, ke mu vava kuyitundidika ko ngatu vava sunda akaka o nene.

Vena mpe ye ntangwa akaka kasonga o Yesu vo wazolanga kikilu yingiana-ngiana. Vioka ngonde, bantwasila yingiana-ngiana. Alongoki babasimini. Kansi o Yesu ovovese alongoki andi vo: ‘Nuyambula yingiana-ngiana bez’oku ngina, ke nubasimi ko: kadi e kintinu kia Nzambi ki’awana bena wau.’ Ubatensekele o moko, ubasambwidi. Nga ke diambote ko mu zaya vo o Yesu wazolanga yingiana-ngiana?