Icisimicisyo 94: Balitemenwe Abanice
LOLESYA baYesu apa balifukete umusankwa umwanice. Ungabona ati icinenene baYesu balasakamana abanice. Abalalume abalukutamba ni ntangisi syabo. Mba findo baYesu balukulabila kuli syo? Leka tufwailisye.
BaYesu ne ntangisi syabo eli bacibwela lukoso ukufuma pa lwendo lwa musinso utali. Mu nsila intangisi syacipikisyanya isine syenka. Popele panuma ya lwendo baYesu basiipusya ati: ‘Mba findo mwalukupikisyanya pa nsila?’ Icine, baYesu balifisi ifi bacilukupikisyanya. Pano baipusya icakwipusya pakweba’ti babone kani intangisi syakubabula.
Intangisi tekuti syasuke, nipakuti mu nsila syalukupikisyanya ati mba ninani umukulu pali syo? Simbi intangisi silukufwaya ukuba isicindeme ukucila pa sibyabo. Mba baYesu bakusibula syani ati tacelelwe syo ukuba isicindeme?
Baita akanice akalalume, ne kukemakanika pantangile yabo bonse. Eli balabila ku basambile babo ati: ‘Ndukufwaya mwebo mwisibe ici mucinenene ati, Kani tesi mwaluluke ne kuba koti banice, tesi mukengilemo mu bufumu bwa baLesa. Umuntu umucindeme makosa mu bufumu ni wopelo’yo uulicefya koti kanice aka.’ Kani waisiba umulandu baYesu balabiliile’fi?
Abana abanice ukwakuti tabasakamana ukuba abakulu neli abacililepo ukucindama pa babyabo. Popele intangisi silyelelwe ukusambilila ukuba koti banice mu nsile’yi kabili tesi ukupikisyanya ati mba ninani umukulu neli umucindeme.
Kuli nasimbi impindi nasyo, ili baYesu balangisya ifi basakamana abana abanice. Ili papite’myensi inini abantu bambi baleta abana babo mukubona baYesu. Intangisi syaesya ukubacicila. Pano baYesu bababula abasambile babo ati: ‘Tulekeni utwanice ati twise kuli nebo, kabili mwitucicila yo, pakuti ubufumu bwa baLesa buli ku bantu abakube’fi.’ Eli baYesu batufukata utwanice, ne kutusyukisya. Tali cintu iciweme ukwisiba ati baYesu balitemenwe abanice?
Matayo 18:1-4; 19:13-15; Mako 9:33-37; 10:13-16.
Ifyakwipusya
- Mba findo intangisi silukupikisyanya ili silukubwelelamo ukufuma pa lwendo ulutali?
- Mba nindo baYesu baitila akanice ne kukemakanika pantangile ya ntangisi?
- Kani nimuli isa’nsila intangisi syelelwe ukusambilila ukuba koti banice?
- Ili papita lukoso imyensi iinini, kani baYesu balangisya syani ukweba’ti balitemenwe abanice?
Ifyakwipusya na fimbi
- Pendeni Matayo 18:1-4.
Mba nindo baYesu baalukupyungisisya ifyakupalanyako pa kusambisya? (Mat. 13:34, 36; Mako 4:33, 34)
- Pendeni Matayo 19:13-15.
Mba niisa imibelo ya banice twelelwe ukutuntulula kani tulukufwaya ukwabanako amasyuko aakesila mu Bufumu? (Amasa. 25:9; 138:6; 1 Kol. 14:20)
- Pendeni Mako 9:33-37.
Kani findo baYesu basambisye abasambile babo pa lwakufwaisyo’bukulu? (Mako 9:35; Mat. 20:25, 26; Gal. 6:3; Filip. 2:5-8)
- Pendeni Mako 10:13-16.
Mba cali icipubile abantu ukuya kuli baYesu, kabili findo baeluda aba buKlistu bangasambililako ku cakubwenako cabo? (Mako. 6:30-34; Filip. 2:1-4; 1 Tim. 4:12)
