TALA pano Yesu ufumbakenye kanuke. Ubamone’mba Yesu utele banuke mutyima. Bantu bamutala’ba i batumibwa. Yesu wibanenanga bika? Tutalei.

Yesu ne batumibwa bandi bakīya mu lwendo lulampe. Pobadi bāya, batumibwa badi bepotomeja pa mwanda umo. Penepo abo pa kufika, Yesu webepangula’mba: ‘Kyomwadi mufwila mwishinda i kika?’ Na bubine Yesu uyukile uno mwanda. Ino, waipangula batumibwa mwanda wa kuyuka shi basa kumusapwila’o.

Batumibwa abaube, mwanda mwishinda, badi bafwila kuyuka i ani mukatampe mobadi. Batumibwa bamo basakanga kwipa bulēme kutabuka bakwabo. Ino Yesu usa kwibasapwila namani’mba, ke kiyampepo kufwila bukatampe?

Waite mwanuke mwana-mulume, wamwimika kumeso a abo bonso. Kupwa kanena bana ba bwanga’mba: ‘Nsaka kwimuyukija kino biyampe, shi kemwalamukilepo bwa banuke batyetye, kemukatwelapo umbulopwe bwa Leza. Mukatampe umbulopwe i yewa udi bwa uno mwanuke.’ Uyukile kyanenena Yesu namino?

Bine, banuke kebalwilangapo bukatampe nansha kupebwa bulēme kupita bantu bakwabo. Nanshi batumibwa bafwaninwe kwikala bwa banuke ne kuleka kufwila bukatampe nansha kupebwa bulēme.

Yesu wate banuke mutyima ne mu bitatyi bikwabo. Myeji mityetye kupita’po, bantu bamo abaleta babo bana kudi Yesu. Batumibwa abasake kwibapanga. Ino Yesu wanena batumibwa’mba: ‘Lekai bana bāye kondi, kemukibapangai, mwanda bulopwe bwa Leza i bwa bantu badi bwa abo.’ Kupwa Yesu wafumbakanya banuke ne kwibesela. Mwene i kiyampe kuyuka’mba Yesu usenswe banuke batyetye?