Chihande 94

Azanga Vana Vavandende

ACHITALE Yesu omu namusangachila mwana wamundende hano. Unahase kumona ngwove Yesu chikupu azanga vana vavandende. Malunga vanakumutala hivaposetolo jenyi. Yesu anakuvalweza ika? Tuwanenu vyuma anakuhanjika.

Yesu navaposetolo jenyi mukufuma haungeji wausuku. Mujila, vaposetolo vapwanga nakulitatwokesa. Omu vanahete, Yesu mwavehula ngwenyi: ‘Mwapwanga nakulihwojola chuma muka mujila?’ Chikupu vene, Yesu nejiva chuma valihwojolanga. Oloze nahulisa amone nge vaposetolo navamulwezacho.

Vaposetolo vanaholo kulu, mwomwo valihamikanga jipami mujila ngwavo iyaze ou nahambakana vakwavo. Vaposetolo vamwe vanasake kupwa vavalemu kuhambakana vakwavo. Jino Yesu mwavalweza ngachilihi ngwenyi chakuhenga mutu kusakanga kuhambakana vakwavo?

Hikusanyika mwana wamundende, nakumwimika kumeso avo. Himwamba kutumbaji twenyi ngwenyi: ‘Chamwenemwene nangumilweza ngwami, Shina kuvanga namwalumuka nakupwa nge mwana wamundende, mokomoko kamweshi kukengila muwangana waKalungako. Wose mwalinyisa nge uno mwana, ikiye vene nahambakana vakwavo muwangana.’ Unejiva vyahanjikililile Yesu ngana tahi?

Chamwaza, vana vavandende chikuma kaveshi kufwila vahambakane vakwavo chipwe kupwa vavalemu kuzomboka vakwavoko. Shikaho vaposetolo vatela kupwa nge vana nakuzeneka kulitatwokesa haunene chipwe haulemu.

Kujili jishimbu jeka nawa haze Yesu mwasolola omu azanga chikuma vana vavandende. Omu hanahichi tukweji vavandende, vatu vamwe hikuneha vana vavo kuli Yesu. Vaposetolo hikuvakanyisa. Oloze Yesu mwalweza vaposetolo ngwenyi: ‘Vechenu vana vezenga kuli Ami. Kanda muvakanyisako, mwomwo wangana waKalunga unapu wavatu vangana.’ Jino Yesu hikuvasangachila, nakuvakisula. Kutala kachawahile hakwijiva nge Yesu azanga vana vavandendeko nyi?

Mateu 18:1-4; 19:13-15; Mako 9:33-37; 10:13-16.