CHÓTSENLALAI je Jesús je títsoakjá tiʼndí xosíkji. Matsen nga mandosinle je xtiʼndí. Je chjota xi tjíokotsensíle jéní pastrole. A ʼyaní jméni xi títsole Jesús. Kataʼyalaa.

Je Jesús kʼoa kao pastrole nʼio kjin jñani jaʼaini. Je pastro tsakjaoti ya yandia. Kui kʼianga je kichó jñani tsakatio kitsosínile Jesús: “Jmé xi tichobatiyaño ya yandia”. Je Jesús be jmeni xi tsakjaotini. Tonga kuinga kiskonangisínile nga mele skoe tsa kʼoakuitsole jmeni xi tsakjaotini je pastrole.

Likui jokitso je pastro, nga kui tsakjaotini ya yandia ʼyáni xi ngisa ngʼa tíjnale xínkjín. Tjínkʼa xi ngisa ngʼa mele koatiole xínkjín. Jméni xi kitsole Jesús nga tsín ndatjín nga kʼoasʼin ngʼa koatiole xínkjín.

Je Jesús jngo tiʼndí kinchjale, kʼoa ya kisikaséjna ya ngixko̱n ngatsʼi. Kʼoa kitsole chjota tjenngile: “Nda katasʼejinno xi tʼatsʼe jebi: Tokʼia tsa kʼoantjaiyao kʼoa tsajo xtiʼndí koa̱nkjoaon, nga koa̱n koatexomao ya ngʼajmi. Je chjota xi ngʼa kʼoéjna jéní ʼyani xi kʼoasʼin joni tsa tiʼndí xokji”. A ʼyaní ánni kʼoakitsosíni Jesús.

Kuinga je xtiʼndí likui kui síkjaʼaitsjen tsa ngʼa koatiole xínkjín. Kʼoa kui kʼoatsakʼinsínile je pastro nga jo xtiʼndí katamakjoan, kʼoa nga tsínkui skanyani ʼyáni xi ngisa ngʼa tíjnale xínkjín.

Kʼoati nga kjaʼai nichxin, tsakakó Jesús nga nʼio koanndosinle xi tʼatsʼe xtiʼndí. Xije jaʼato jngo jao sá, tjínkʼa chjota xi ya kichokaotʼale Jesús je xtiʼndíle. Je pastro tsakʼéchjoale. Tonga Jesús kitsole: “Tʼaiʼndelao nga katjinroakonna je xtiʼndí, ali bʼechjoajinlao, nga je xi kʼoakjoan joni tsa je xtiʼndí jé xi ya koatexomakao ngʼajmi Rey xi kiskoejin Niná”. Xijekoan, kitsoakjá je xtiʼndí, kʼoa kisichikontʼain. ¡Jótondani nga ʼya kʼianga kʼoasʼin tsjoake xtiʼndí je Jesús! A tsí jaon.