Tanojnots 94

Jesús kintasojtak konemej

XIKITA, nikan Jesús kinapalojtok se konet. Moita ika yej iminka motekipachoua konemej. Takamej tein kiitstokej yejuan itatitaniluan. ¿Tikmati toni kiniluia Jesús?

Jesús uan itatitaniluan uejka yajkaj uan mokepkajya. Itech ojti, tatitanilmej motajtolteuijkej. Yejika, satepan keman ajsikej, Jesús kintajtanij: ‘¿Toni ika namotajtolteuiayaj ojti?’ Tein melauj Jesús kimatia toni ika motajtolteuijkej. Sayoj kinekia kiitas ox kiiluiskiaj, yejika kintajtanij.

Tatitanilmej amo tanankilijkej, porin itech ojti motajtolteuiayaj akoni eskia okachi ueyichiujkej. Sekin kinekiaj okachi moueyichiuaskej inpan oksekin. ¿Keniuj kiniluiskia Jesús ika amo kuali maj kinejnekinij moueyichiuaskej?

Yej kinotsak se konet, uan kitalij imin ixpan imomachtijkauan, uan kiniluij: ‘Nikneki kuali xikmatikan nejin: Komo amo namopataj uan namochiuaj kemej konemej, amo keman nayetoskej itech itekiuajyo Dios. Taltikpaknenkej tein okachi ueyi itech tekiuajyot, yejua tein mochiua kemej nejin konet’. ¿Tikmati keyej kijtoj nejin?

Konemej amo kinemiliaj mochiuaskej tayekananij niono moueyichiuaskej inpan oksekin. Yejika tatitanilmej monekia mochiuaskej kemej konemej uan amo moteuiskiaj ika akoni eskia tayekankej oso ueyichiujkej.

Okseki tonalmej satepan, Jesús no kinextij ika iminka moteltekipachouaya konemej. Se ome eyi metsti satepan keman taltikpakneminij kiniuikayaj konemej maj kiitatij Jesús, tatitanilmej kinekiaj kintsakuiltiskej. Sayoj ika Jesús kijtoj: ‘Xikinkauakan konemej maj ualakan nouan, uan amo xikintsakuiltikan, porin itekiuajyo Dios imin axkatis taltikpakneminij kemej konemej’. Ompa, kininapaloj konemej uan kintiochiuak. ¡Semi kuali tikmatiskej ika Jesús kintasojtak konemej! ¿Melauj?

Mateo 18:1-4; 19:13-15, NM; Marcos 9:33-37; 10:13-16.