BONA Jesu mo o gokaretše mošemane yo monyenyane. O ka bona gore Jesu o be a rata bana e le ka kgonthe. Banna bao ba mo lebeletšego ke baapostola ba gagwe. Jesu o be a re’ng go bona? Anke re bone.

Jesu le baapostola ba gagwe ba be ba sa tšwa go boa leetong le letelele. Ge ba le tseleng, baapostola ba ile ba ngangišana ka selo se itšego. Ka gona mafelelong a leeto Jesu a ba botšiša a re: “Ke’ng seo le bego le ngangišana ka sona tseleng?” Ge e le gabotse, o be a tseba seo ba bego ba ngangišana ka sona. Eupša o ile a botšiša potšišo yeo e le gore a bone ge e ba ba be ba tla mo araba.

Baapostola ba ile ba homola, ka gobane ge ba le tseleng ba be ba ngangišana ka taba ya gore ke mang mo go bona e lego yo mogolo go ba feta. Baapostola ba bangwe ba be ba nyaka go ba ba bagolo go feta ba bangwe. Jesu o be a tla ba botša bjang gore ke phošo go nyaka go ba yo mogolo?

O ile a bitša mošemane yo monyenyane gomme a mmea gare ga bona ka moka. Ke moka a re go bona: ‘Ruri ke nyaka gore le tsebe se, ka ntle le gore le fetoge le be bjalo ka bana ba banyenyane, le ka se tsene mmušong wa Modimo le gatee. Motho yo mogolo kudu mmušong wa Modimo ke yoo a ka swanago le ngwana yo.’ Na o a tseba gore ke ka baka la’ng Jesu a ile a bolela se?

Bana ba banyenyane ga ba tshwenywe ke taba ya go nyaka go ba ba bagolo go feta ba bangwe. Ka gona baapostola ba be ba swanetše go ithuta gore ba swane le bana ka tsela ye gomme ba se ke ba ngangišana ka taba ya gore ke mang yo mogolo goba yo bohlokwa gare ga bona.

Go na le dinako tše dingwe gape tšeo ka tšona Jesu a bontšhitšego gore o rata bana kudu. Ka morago ga dikgwedi tše sego kae, batho ba bangwe ba ile ba tliša bana ba bona gore ba tlo bona Jesu. Baapostola ba ile ba leka go ba thibela. Eupša Jesu a re go bona: ‘Lesang bana ba tle go nna, le se ke la ba thibela, gobane mmušo wa Modimo ke wa batho ba bjalo ka bona.’ Ke moka Jesu a gokarela bana bao gomme a ba šegofatša. Na ga se mo go kgahlišago go tseba gore Jesu o rata bana?

Mateo 18:1-4; 19:13-15; Mareka 9:33-37; 10:13-16.