TALA apa Yesu etyi akondekapo omona. Upondola okuti Yesu ankho tyili uhole ovana. Ovalume vekahi nokutala, ono apostolu mbae. Oityi Yesu ekahi nokuvepopila? Tutalei.

Yesu nono apostolu mbae ankho pahe vakondoka koungendi. Mondyila ono apostolu ankho vekahi nokutañguna. Moluotyo, Yesu evepulu okuti: ‘Oityi ankho mukahi nokutañguna mondyila? Tyotyili, Yesu ankho utyii oityi vekahi nokutañgunina. Mahi, walinga epulo opo atale inkha ono apostolu mavemutolela.

Ono apostolu kavemupele ekumbululo, mokonda mondyila ankho vekahi nokutañguna olie omunene vali pokati kavo. Ono apostolu mbumue vahandele okukala vakolela vali tyipona vakuavo. Oñgeni Yesu mevelongesa okuti katyaviukile okuhanda okukala omunene?

Yesu waihana omona, emutalameka komutue wavo aveho. Iya apopila ovalongwa vae okuti: ‘Nahanda munoñgonoke okuti, inkha kamupilulula onkhalelo yenyi amukala ngovana ovatutu, kamamunyingila Mouhamba wa Huku. Mokonda omunene Mouhamba oyouna ukala ngomona ou.’ Utyii omokonda yatyi Yesu apopila ngotyo?

Mokonda ovana kavesukile okukala ovanene tyipona vakuavo. Ngotyo, ono apostolu ankho vena yokulilongesa okukala ngovana, avahatañguna kombinga yokukala ovanene.

Yesu walekesile ovikando ovinyingi okuti ankho uhole ovana. Papita onohanyi mbehehi, ovanthu vamue avahimbika okueta ovana vavo ku Yesu. Ono apostolu ankho vekahi nokuvetyilika. Mahi, Yesu atolela ono apostolu mbae okuti: ‘Yekei ovana veye kuame, muhevetyilikei, mokonda vana mavanyingila Mouhamba wa Huku vena okukala ngovana.’ Ngotyo, Yesu akondekapo ovana, iya eveavela ononkhaneno onongwa. Hatyiwako okunoñgonoka okuti Yesu uhole ovana?