Ekitebyo 94

Naakunda Abaana Bato

REEBA Yesu aha abumbatiire omwojo muto. Buzima noobaasa kureeba ngu Yesu naafayo aha baana bato. Abo bashaija abarikubareeba n’abeegi be. Yesu naabagambira ki? Reka twetegyereze.

Yesu n’abeegi be baaheza kuruga omu rugyendo ruraingwa. Omu muhanda abeegi baaba nibahakana bonka na bonka. N’ahabw’ekyo ku baheza orugyendo Yesu ababuuza ati: ‘Mwaba nimuhakana ahari ki omu muhanda?’ Buzima naamanya eki baaba nibahakanaho. Kwonka yaababuuza ekibuuzo eki kureeba yaaba baraamugambire.

Abeegi tibamugarukamu, ahabw’okuba omu muhanda baaba nibahakana ngu n’oha omuri bo ori mukuru. Abeegi abamwe nibenda kuba bakuru okukira abandi. Yesu naaza kubagambira ata ngu tikihikire kwenda kuba mukuru?

Ayeta omwojo muto, amwemereza omu maisho gaabo boona. Atyo agambira abeegi be ati: ‘Niinyenda ngu mumanye eki, ku muriba mutahindukire, mukaba nk’abaana bato, timuritaaha omu bukama bw’omu iguru nakakye. Omuntu omukuru omu bukama bwa Ruhanga n’ogwo orikwetwara nk’omwana ogu.’ Noomanya ahabw’enki Yesu yaagambire eki?

Abaana bato tibaine eki barikwerarikirira ahaby’okuba bakuru ninga ab’ekitiinisa okukira abandi. N’ahabw’ekyo abeegi bashemereire kwega kuba nk’abaana bato omu muringo ogu barekye kuhakana ngu n’oha orikukira obukuru nari shi ekitiinisa.

Hariho n’emirundi endiijo, obu Yesu yaayoreka ku arikufayo munonga aha baana bato. Bwanyima y’emyezi mikye, abandi bantu bakareeta abaana baabo okureeba Yesu. Abeegi baagyezaho kubazibira. Kwonka Yesu yaagambira abeegi ati: ‘Murekye abaana bato baije ahariinye, murekye kubazibira, ahabw’okuba obukama bwa Ruhanga n’obw’abantu abari nk’abo.’ Atyo Yesu yaabumbatira abaana omu mikono ye, yaabaha omugisha. Tikirungi okumanya ngu Yesu naakunda abaana bato?

Matayo 18:1-4; 19:13-15; Mako 9:33-37; 10:13-16.