CHAWILAMPEʼ ri Jesús pa ri wachbʼäl tijan kuqʼaluj ri alaj akʼal. Chawilampeʼ che utz keril ri akʼalabʼ. Ri achijabʼ tijan kekaʼyik are ri täq apóstoles. ¿La awetaʼm su tijan kubʼij Jesús chike?

Jesús xuqujeʼ ri täq apóstoles kʼateʼ xetzalij lo pa jun naj bʼe. Pa ri bʼe ri täq apóstoles tijan kkeyaj kibʼ. Rumal laʼ, chiʼ xeʼopanik ri Jesús xuta wariʼ chike: ‹¿Suche tijan kiyaj iwibʼ pa ri bʼe?› Xchaʼ chike. Jesús retaʼm suche xkeyaj kibʼ. Tekʼuriʼ xuta chike rech kraj krilo we kkebʼij che.

Ri täq apóstoles xechʼaw täj, rumal che pa ri bʼe xkeyaj kibʼ rumal re jachin laʼ ri nim ubʼantajik che kixoʼl. E kʼo jujun chike kkaj nim kibʼantajik che kiwäch nikʼaj chik. ¿Su xubʼan Jesús che ukʼutik che kiwäch che utz täj che kkaj kkebʼan nim che kibʼ?

Jesús xusikʼij jun alaj akʼal, tekʼuriʼ xuya che kiwäch. Tekʼuriʼ xubʼij wariʼ chike: ‹Kwaj kiwetaʼmaj wariʼ: xaq xiw we kikʼex ri inoʼj xuqujeʼ kibʼan junam kukʼ ri akʼalabʼ, kixkunik kixok pa ri ajawbʼäl rech ri Ajawaxel. Ri winaq qas nim ubʼantajik pa ri ajawbʼäl are kubʼan junam rukʼ ri alaj akʼal›. ¿La awetaʼm suche xubʼij wariʼ?

Ri alaj täq akʼalabʼ kketaʼmaj ta ubʼanik nim che kibʼ che kiwäch nikʼaj chik. Rumal laʼ ri täq apóstoles rajawaxik kketaʼmaj ubʼanik junam kukʼ ri akʼalabʼ rech kkeyaj ta kibʼ rech jachin laʼ nim ubʼantajik che kixoʼl.

Pa nikʼaj chik täq qʼij, Jesús xukʼutu che sibʼalaj utz kril wi ri täq akʼalabʼ. Qʼaxnäq chi kebʼ oxibʼ ikʼ, nikʼaj winaq xkekʼam lo täq kalkʼwal rech kkila ri Jesús. Ri täq apóstoles xkeya ta chike ri akʼalabʼ keqʼaxik. Tekʼuriʼ ri Jesús xubʼij wariʼ: ‹Chiya chike ri akʼalabʼ kepe wukʼ, xaq miqʼatej, rumal che ri ajawbʼäl rech ri Ajawaxel kyaʼ chike ri winaq e junam kukʼ ri täq akʼalabʼ›. Tekʼuriʼ xeʼuqʼaluj ri täq akʼalabʼ, xuqujeʼ xuya tewchibʼäl chike. ¡Sibʼalaj utz uretaʼmaxik che ri Jesús keʼuloqʼoqʼej ri täq akʼalabʼ! ¿La jewaʼ?