Tantara 94

Tea Anak’ajà Kelikele Ie

MBA henteo moa Jesosy mitròtro anak’ajà lahilahy io. Tea anak’ajà Jesosy. Apostolin’i Jesosy lahilahy manenty aze, eo reo. Ino ty raha volànin’i Jesosy amin-droze? Ndao ho henteantsika.

Baka nandeha lavitse Jesosy noho apostoline reo. Nifampiresake apostoly reny tan-dala teny. Ka nanontany an-droze Jesosy laha fa vita lia nataon-droze iny hoe: ‘Ino va raha nialianareo hevitse tan-dala teny io?’ Fa nihain’i Jesosy raha nialian-droze hevitse io, fe nanontany apostoline reo avao ie, mba hanenteane vasa hivòla roze.

Tsy nisy namaly apostoly reny, satria nialy hevitse roze tan-dala teny hoe: ia ty farane anabo amin-droze. Maniry ho anabo mandilatse ty hafa ty apostoly sasane. Fe tsy soa raha zay. Ka manao akore ty fomba hananàran’i Jesosy mpianatsine reo?

Nikaike anak’ajà lahilahy zay Jesosy, ka nampitsangànine taloha apostoly reo teo. Nivòla tamy apostoly reo Jesosy laha fa bakeo hoe: ‘Teako ho hainareo, fa laha tsy miova manahake anak’ajà kelikele toy nareo, le tsy hilitse amy fanjakà-Ndranahare ao mihitsy. Ka ze mahay miova manahake ajà toy, ro ho farane anabo amy fanjakà io ao.’ Hainao va ty antone nivolànan’i Jesosy raha zay?

Satria, tsy mahataitse ty anak’ajà kelikele mihitsy ty ho anabo ndra ty hana fahefà mihoatse ty olo hafa. Ka tokone hotahafi’ty apostolin’i Jesosy, toe-tsain’ajà io, fa tsy hialy ty ho anabo na hana fahefà mihoatse ty olo hafa roze.

Nasehon’i Jesosy tamy fotoa hafa kea fa teane biby ty anak’ajà kelikele. Tafarafara atoy, le nisy olo maromaro nanday ty anane tamin’i Jesosy teo. Ho noroàhy apostoly reo roze, fe nivòla tamy apostoly reo Jesosy hoe: ‘Engào hamonjy ahy ajà reo, fa ka rarànareo, satria natao ho ahi’ty olo manahake aze ty fanjakà-Ndranahare.’ Notrotròn’i Jesosy ajà reny laha fa bakeo, sady nameane tsodrano. Tsy soa va ty mahay fa tea anak’ajà kelikele Jesosy?

Matio 18:1-4; 19:13-15; Marka 9:33-37; 10:13-16.