HAREE Jesus iha neʼe hakoʼak labarik kiʼik. Ita bele haree katak Jesus gosta loos labarik kiʼikoan sira. Mane sira neʼebé hateke ba Jesus mak ninia apóstolu sira. Saida mak Jesus hatete daudauk ba sira? Mai ita haree hamutuk.

Jesus no ninia apóstolu sira laʼo rai dook no foin mai fali. Iha dalan, apóstolu sira haksesuk malu. Nuneʼe, Jesus husu ba sira: ‘Imi haksesuk malu kona-ba saida iha dalan?’ Tuir loloos, Jesus hatene sira haksesuk malu kona-ba saida. Maibé nia husu pergunta neʼe atu haree se apóstolu sira hatán ka lae.

Apóstolu sira la hatán, tanba iha dalan, sira haksesuk malu kona-ba ida-neʼebé mak boot liu. Apóstolu balu hakarak sai importante liu fali sira seluk. Oinsá mak Jesus hatudu ba sira katak laloos atu hakarak sai boot liu?

Nia bolu labarik oan ida, no halo nia hamriik iha sira hotu nia oin. Tuirmai, nia hatete ba dixípulu sira: ‘Haʼu hakarak imi hatene loloos katak, Se imi la muda imi-nia an no sai hanesan labarik kiʼikoan karik, imi sei nunka tama Maromak nia reinu. Ema neʼebé boot liu iha reinu mak ema neʼebé sai hanesan labarik ida-neʼe.’ Hatene tansá Jesus hatete hanesan neʼe?

Labarik kiʼikoan la hanoin barak atu sai boot liu ka importante liu fali ema seluk. Nuneʼe, apóstolu sira mós tenke aprende atu sai hanesan labarik kiʼikoan sira, no labele haksesuk malu kona-ba sé mak boot liu ka importante liu.

Iha tempu seluk mós Jesus hatudu katak nia gosta tebes labarik kiʼikoan sira. Fulan balu liutiha neʼe, ema balu lori sira-nia oan atu haree Jesus. Apóstolu koko atu hasees sira husi Jesus. Maibé, Jesus hatete ba apóstolu sira: ‘Husik labarik sira hakbesik haʼu, no labele hapara sira, tanba ema hanesan sira mak hetan Maromak nia reinu.’ Tuirmai, Jesus hakoʼak labarik sira-neʼe, no fó-bensa ba sira. Neʼe diʼak tebes ka lae, atu hatene katak Jesus hadomi labarik kiʼikoan sira?