Makani 94: Ulabayanda Bana Baniini
LANGA Jesu aawa nkwakumbatila mwana. Ulakonzya kubona kuti Jesu masimpe ulabayanda bana baniini. Bantu aaba balangilila mbaapositolo bakwe. Ino ncinzi Jesu ncaamba kuli mbabo? Atubone.
Jesu abaapositolo bakwe ino-ino aawa nibajoka mulweendo lwabo lulamfwu. Munzila baapositolo bali kukazyanya. Basike, Jesu wababuzya kuti: ‘Ino ncinzi ncimwali kukazyanya munzila?’ Pele Jesu ulicizyi ncibali kukazyanya. Nekuba boobo, wabuzya mubuzyo kuti abone naa baapositolo inga bamwaambila.
Pele baapositolo tabavwiili, nkaambo munzila bali kukazyanya kubona uukonzya kuba mupati akati kabo. Bamwi baapositolo bayanda kuti kabalemekwa kwiinda beenzyinyina. Ino mbuti Jesu mbwatiibaambile kuti tacili cibotu kuyanda kuba mupati?
Waita mwana muniini akumwiimikizya kumpela lyabo boonse. Kumane wati kuli basikwiiya bakwe: ‘Ndiyanda kuti muzyibe eeci kuti: Ccita kuti mucince mube mbuli bana baniini, buyo-buyo tamukanjili mubwami bwa Leza. Muntu mupati mubwami, nguyooyo uuba mbuli mwana muniini ooyu.’ Hena ulicizyi Jesu ncaakaambila makani aaya?
Nkaambo kakuti bana baniini tabalikatazyi kuyanda kuba mupati kwiinda bamwi. Aboobo baapositolo beelede kwiiya kuba mbuli bana munzila eeyi ikutali kukazyanya zyakuba mupati.
Alimwi kuli ziindi zimwi Jesu naatondezya mbuli mbwabayanda kapati bana baniini. Kwiinde buyo myezi misyoonto, bantu bamwi baleta bana babo kuzyi kubona Jesu. Baapositolo batalika kubatanda bana. Pele Jesu waambila baapositolo bakwe kuti: ‘Amubaleke bana baboole kuli ndime, mutabakasyi nkaambo bwami bwa Leza mbwabaabo bali mbuli bana aaba.’ Kumane Jesu wabanyamuna bana akubaleleka. Hena tacili cibotu kuzyiba kuti Jesu ulabayanda bana baniini?
Matayo 18:1-4; 19:13-15; Maako 9:33-37; 10:13-16.
Mibuzyo
- Ncinzi baapositolo ncobali kukazyanya kabajoka mulweendo lwabo lulamfwu?
- Nkaambo nzi Jesu ncaaitila mwana muniini akumwiimikizya kumpela lyabaapositolo?
- Muunzila nzi baapositolo mobeelede kuba mbuli bana baniini?
- Nikwakainda myezi misyoonto, mbuti Jesu mbwaakatondezya kuti ulabayanda bana?
Mibuzyo aimwi
- Bala Matayo 18:1-4.
Nkaambo nzi Jesu ncabelesyela zikozyanyo mukuyiisya? (Mt. 13:34, 36; Maako 4:33, 34)
- Bala Matayo 19:13-15.
Mbube nzi bwabana baniini mbotweelede kwiiya ikuti katuyanda kutola lubazu muzilongezyo zya Bwami? (Int. 25:9; 138:6; 1 Kor. 14:20)
- Bala Maako 9:33-37.
Ncinzi Jesu ncaakabayiisya basikwiiya bakwe kumakani aakuyanda zyuuno zisumpukide? (Maako 9:35; Mt. 20:25, 26; Gal. 6:3; Flp. 2:5-8)
- Bala Maako 10:13-16.
Mbuti Jesu mbwaatakali kuyoosya kusikila, alimwi ncinzi baalu Banakristo ncobakonzya kwiiya kucikozyanyo cakwe? (Maako 6:30-34; Flp. 2:1-4; 1 Timo. 4:12)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Kuyiisya Kujatikizya Kulekana Alimwi Akuyanda Bana
Jesu waindana kapati abasikwiiya bakwe kujatikizya mbwabona bana. Nkaambo nzi?
