KʼELA jastal ja Jesús stelunej ja yal keremi, soka it wa xbʼobʼ awil ja janekʼ wa syajtay ja yal untiki. Ja winike matik joyane ekʼi jaʼa snebʼumaniki. ¿Wan maʼ xa naʼa jasa wan yaljel yabʼ ja snebʼumaniki?

Jesús soka snebʼumaniki wanto xa julye bʼa jun najat bʼejyel. Ja bʼa bʼejto aye jani ja nebʼumaniki ajyiyujile jun tsatsal skʼumale. Ja yuj, tsaʼan yajni julyeʼi, Jesús sjobʼo yile: «¿Jasa wa kʼumalex ja bʼa bʼeji?». Jesús wani snaʼa jasa skʼumaleʼi, pe sjobʼoni yile bʼa oj yil ta oj yal-e.

Ja nebʼumaniki mini sjakʼaweʼa yujni ja bʼa bʼeji ja wane yaljel sbʼaja machunkiluk ja bʼa yeʼnle jaʼa mas tʼilani. Jujuntik bʼa yeʼnle wa skʼanawe oj iljuke mas tʼilan yuja tuki. ¿Jastal maʼ oj yal yabʼ ja Jesús ja snebʼumaniki mini lekuk yajel sbʼaje niwanil?

Jesús spayajan jun yal kerem sok ti yaʼa tekʼan bʼa snalan ja snebʼumaniki. Ti yala yabʼyeʼa: «Meran wa xkala awabʼyex ja it: Mikʼa la ajyiyex jastal yal untik, mini oj ochanik ja bʼa xchonabʼil ja Dyosi. Ja maʼ wa skʼulan sbʼaj chʼinili jastal yal untik iti, yeʼnani mas niwan oj ajyuka ja bʼa xchonabʼil ja Dyosi». ¿Wan maʼ xa naʼa jas yuj yala it?

Jani yuj ja yal untiki mi ja wajel skʼujole oj yaʼ sbʼaje niwanil sok mas tʼilan yuja tuki. Ja yuj ja nebʼumaniki tʼilani oj snebʼ-e bʼa oj yaʼ sbʼaje jastal ja yal untiki sok bʼa mi oj kʼeʼuke kʼumal yuj yajel sbʼaje niwanil ma mas tʼilan.

Chomajkil bʼa tuk ekʼele, Jesús sjeʼa jelni stalna syajulal ja yal untiki. Ixawik tsaʼan, jujuntik nantatal wa xyiʼaje och yi ja Jesús ja yal yuntikileʼi. Ja nebʼumaniki skomowe ja yal untiki bʼa mok waj staʼe ja Jesús. Pe ja Jesús yala yabʼye: «Lek ja wa xjak ja yal untiki, mi lom xa komowex, yujni ja xchonabʼil ja Dyosi jaʼ sbʼaj ja matik wa sjeʼawe ja smodo jastal ja yal untiki». Anto ti stela ja yal untiki sok ya yi slekilal. ¿Anke jel tsamal snajel jastal ja Jesús jel syajtay ja yal untiki?