KAʼAKXILHTI Jesús akglhchachipanit aktsu kgawasa. Akxilhpat pi Jesús kapaxkiy laktsu kamanan. Chu lakchixkuwin wantiku akxilhmakgolh Jesús wa xʼapóstoles. ¿Katsiya wix tuku kawanima Jesús?

Jesús chu xʼapóstoles kajku chinkgolh wi niku makgat xʼankgonit. Anta ktiji apóstoles kgalhikgoy taʼakglhuwit. Wa xlakata akxni xchinkgonitta Jesús kakgalhskilh: ¿Tuku xlitaʼakglhuwatnanpatit anta ktiji? Pero Jesús katsiya tuku xlakata xliʼakglhuwatnamakgolh. Pero Jesús kakgalhskilh, xlakata naʼakxilha komo xʼapóstoles nawanikgoy tuku xlitakglhuwimakgolh.

Xʼapóstoles ni kgalhtikgolh xlakata anta ktiji xlitakglhuwimakgolh xlakata tiku tlakg xapuxku. Makgapitsi tlakg xalakpuxkun wamputunkgoy. ¿La xʼama kawaniy Jesús pi nitlan tlakg lanka nawanputunkan?

Xla tasanilh aktsu kgawasa chu wililh kxlakatinkan apóstoles. Chu kawani xtamakgalhtawakgen: Klakaskin liwana kakatsitit uma: Komo mintayatkan ni nawan chuna la xtayat chatum aktsu kgawasa, nikxni katitanutit kxtamapakgsin Dios. Wantiku tlakg lanka wanputun kxtamapakgsin Dios chuna xliwanat la uma aktsu kgawasa. ¿Katsiya wix tuku xlakata chuna kawanilh?

Laktsu kamanan ni lakpuwankgoy tlakg lanka xlakatsukut nawankgoy ni xawa amakgapitsin. Wa xlakata apóstoles nachuna xliwanatkan la laktsu kamanan chu ni nalalitalatlaway xlakata tiku tlakg lanka xlakatsukut o tlakg xapuxku nawankgoy.

Jesús makglhuwa na limasiyay pi snun kapaxkiy laktsu kamanan. Xtitaxtunitta ni akglhuwa papaʼ makgapitsi kristianos liminikgolh Jesús xlaktsu kamanan xlakata naʼakxilhkgoy Jesús. Chu xʼapóstoles nixlakaskinkgoy nalinikgoy Jesús chu xkamalakgachokgoputunkgoy. Pero Jesús kawaniy: Kakamaxkitit talakaskin kakilakgminkgolh ni kakamalakgachokgotit, xlakata xtamapakgsin Dios wa nakalakgchan kristianos watiku xtayatkan la laktsu kamanan. Akxni tama kaʼakglhchachipalh lakgskgatan chu kasikulanatlawalh. ¡Lu lipaxaw pi katsimaw la Jesús kapaxkiy laktsu kamanan!, ¿nixlikana?