HI NGA wona Jesu laha na a wukarele mufanyana. U nga zi wona ku ngalo Jesu wa khatalela vanana hakunene. A vapostoli vakwe hi vavanuna lava va cuwukiselako. Zini lezi Jesu a zi wulako ka vona? A hi zi poleni.

Jesu ni vapostoli vakwe va ha hi ku chikela hi ka pfhumba ga hombe. A vapostoli vave ni kukanetisana lomu ndleleni. Hikwalaho anzhako ka pfhumba lego Jesu i va wutisa ku ngalo: ‘Mu wa kanetisana hi yini laha ndleleni?’ Hi lisine, Jesu wa zi tiva lezi va nga kari va kanetisana hi zona. Kanilezi yena i va maha ziwutiso na a fela ku wona ku ngalo a vapostoli va ta mu byela ke.

A vapostoli a va hlamuli, hakuva lomu ndleleni va wa kari va kanetisana xungetano hi loyi a nga wahombe xikari kabye. A vapostoli vo kari va lava ku maha va lisima a ku hunza vanwani. I ta va byelisa kuyini Jesu ku ngalo a hi zi nene ku xuva ku maha wahombe ke?

Yena i vitana a mufanyana, a mu yimisa mahlweni ka vona vontlhe. Zonake aku ngalo ka vapizani vakwe: ‘Hi lisine nzi lava lezaku mu tiva lezi, Loku mu nga hunzuluki mu maha kota vanana va tsongwani, cima mu nga ta enghena mufunweni wa Nungungulu. A wahombe mufunweni hi loyi a hunzukako a fanana ni nwanana loyi.’ Wa zi tiva a ku hikuyini Jesu a wulileko lezo?

Ina, a vanana va tsongwani nguvu a va karateki hi ku lava ku maha vahombe kutani va lisima a ku hunza lezi vanwani va nga zona. Hikwalaho a vapostoli va wa fanele ku gonza ku maha kota vanana hi ndlela leyo niku va nga phikizani hi ku maha vahombe kutani va lisima.

Ku na ni zinwani zikhati, kambe, laha Jesu a kombako lezi a khatalelisako zona vanana va tsongwani. Loku ku hunzile tihweti titsongwani a vanhu vo kari va neha vanana vabye lezaku va ta wona Jesu. A vapostoli va zama a ku va beletela. Kanilezi Jesu i byela vapostoli vakwe ku ngalo: ‘Tsikani vanana vata ka mina, mu nga va beleteli, hakuva a mufumo wa Nungungulu wu lumba vanhu vo kota vona.’ Makunu Jesu i teka vanana mawokweni yakwe, a va katekisa. A hi zi nene ku tiva lezaku Jesu wa ranza vanana va tsongwani?