DORA hanu Yesu abumbatiire omwojo omuto. Nosobora kurora nkoku Yesu arukufayo hali abato. Abasaija abarukubarolerra bakwenda be. Yesu nabagambira ki? Katukirole.

Yesu n’abakwenda be baakaruga murugendo oruraira. Mu muhanda abakwenda batungire empaka hagati yabo. Hanyuma y’orugendo Yesu abakaguza: ‘Kiki ekimubaire nimuhakanaho mu muhanda?’ Mananu, uwe Yesu akaba amanyire ekibakaba nibahakanaho. Baitu akaguza kurora abakwenda obu barasobora kumugambira.

Abakwenda tibamugarukamu, habwokuba mu muhanda babaire nibahakanira obukuru. Abakwenda abamu nibenda ekitiinisa ekirukukira ha ky’abandi. Yesu yakubagambiire ata ngu tikihire kugonza kuba w’ekitiinisa kukira abandi?

Ayeeta akoojo kandi akemereza hagati yabu boona. Hati nukwo agamba abegesebwa be: ‘Ninyenda mumanye kinu. Mu mananu, kakuba mutahinduka mukaba nk’abaana abato, timulisobora kutaaha mubukama bwa Ruhanga. Omuntu arukukirayo mubukama nuwe afooka nk’omwana onu.’ Omanyire habwaki Yesu yagambire kinu?

Mali abaana abato muno tibafayo noha arukukirayo rundi aine ekitiinisa okira abandi. Kale nu, abakwenda basemerire kwega kuba nk’abaana mumulingo gunu, kandi tibasemerire kukunganira obukuru rundi ekitiinisa.

Haroho n’emirundi endi nambere Yesu yayolekere ngu nafayo h’abaana abato. Emyezi emike obu yahingwireho, abantu abamu bakaleta abaana babu kurora Yesu. Abakwenda bakalengaho kubahinda kwija haliwe. Baitu Yesu yagamba abakwendabe: ‘Muleke abaana baije hali nyowe kandi mutabatanga, habwokuba obukama bwa Ruhanga buli bwa abali nk’abo.’ Nukwo Yesu kukwata abaana mu mikono ye, kandi boona yabaha emigisa. Tikiri kirungi kumanya ngu Yesu nagonza abaana abato?