KITAA hi Jesus dinhi, ginhahangkopan niya an gutiay nga bata. Makakasiring ka nga hinigugma gud ni Jesus an gudtiay nga kabataan. An kalalakin-an nga nagkikita amo an iya mga apostol. Ano an ginsisiring ni Jesus ha ira? Aton kitaon.

Nagkaabot pa la hi Jesus ngan an iya mga apostol tikang ha hirayo nga byahe. Han nakadto pa hira ha dalan, naglantugi an mga apostol. Salit, pag-abot nira, nagpakiana hi Jesus: ‘Ano an iyo ginlalantugian kanina?’ Ha pagkamatuod, maaram gud hi Jesus kon ano an ginlantugian. Kondi nagpakiana hiya basi hibaroan kon susumatan ba hiya han mga apostol.

Waray hira bumaton tungod kay ginlantugian nira kon hin-o an pinakalabaw ha ira. Karuyag han iba nga apostol nga magin mas importante kay ha iba. Ano daw la an isisiring ni Jesus ha ira basi hibaroan nga sayop an paghingyap nga magin labaw?

Gintawag ni Jesus an usa nga bata, ngan ginpatindog ito ha atubangan nira ngatanan. Katapos, nagsiring hiya: ‘Karuyag ko nga hibaroan niyo ini, Kon diri kamo magbag-o ngan magin sugad han gudtiay nga kabataan, diri gud kamo makakasulod ha ginhadian han Dios. An pinakalabaw ha ginhadian amo an usa nga pariho hini nga bata.’ Maaram ka ba kon kay ano nga ginsiring ini ni Jesus?

An kabataan diri nababaraka kon hin-o an mas labaw o mas importante. Salit sadang mahibaro an mga apostol nga subaron ito nga kalidad han kabataan ngan diri mag-araway kon hin-o an importante.

May-ada liwat mga panahon nga ipinakita ni Jesus nga hinigugma gud niya an kabataan. Paglabay hin pipira ka bulan, gindara han iba nga tawo an ira mga anak basi makita hi Jesus. Ginpugngan hira han mga apostol ha pagdaop ha iya. Kondi ginsidngan ni Jesus an mga apostol: ‘Tuguti an kabataan nga dumaop ha akon, ngan ayaw hira pagdid-i, kay an ginhadian han Dios para ha mga sugad ha ira.’ Katapos, ginpangugos ni Jesus an kabataan, ngan ginbendisyonan hira. Makalilipay hibaroan nga hinigugma gud ni Jesus an kabataan, diri ba?