HISITOLIA 94
ʼE ʼOfa Ia Ki Te Tamaliki Liliki
ʼE KOUTOU sio kia Sesu ʼi henī ʼe ina toʼo te kiʼi tama ʼi ʼona nima. ʼE feala hatatou ʼui neʼe ʼofa moʼoni ia Sesu ki te ʼu kiʼi tamaliki. Ko te ʼu tagata ʼaē ʼe nātou sioʼi ia ia ʼe ko tana ʼu ʼapositolo. Koteā koa te meʼa ʼaē neʼe ʼui e Sesu kia nātou? Tou vakaʼi pe koteā te meʼa ʼaē neʼe hoko.
Ko te hoki tau mai ʼaenī ʼa Sesu pea mo tana ʼu ʼapositolo mai tanatou fagona loaloaga. ʼI te ala neʼe ʼi ai te meʼa neʼe palalau kiai te ʼu ʼapositolo. Koia ʼi te ʼosi ʼo tanatou fagona neʼe fehuʼi age e Sesu kia nātou: ‘Koteā koa te meʼa ʼaē neʼe koutou palalau kiai ʼi te ala?’ ʼI tona fakahagatonu, neʼe ʼiloʼi e Sesu te meʼa ʼaē neʼe nātou palalau kiai. Kae neʼe ina fehuʼi age ke ina ʼiloʼi peʼe tala age anai e te ʼu ʼapositolo kia ia.
Neʼe mole tali age e te ʼu ʼapositolo, koteʼuhi neʼe nātou fetalanoaʼaki ʼi te ala pe ko ai ia nātou ʼaē ʼe lahi ake. Ko ʼihi ʼi te ʼu ʼapositolo neʼe nātou fia maʼuhiga age ʼi ʼihi. ʼE feafeaʼi anai he fakahā age e Sesu kia nātou ʼe mole lelei hanatou fia lahi age ʼi he tahi kehe?
Neʼe ina pāuiʼi te kiʼi tamasiʼi, pea neʼe ina fakatuʼu ʼi ʼonatou muʼa. Pea ina ʼui age ki tana ʼu tisipulo: ‘ ʼE ʼau loto ke koutou ʼiloʼi te meʼa ʼaenī, kapau ʼe mole koutou fetogi pea mo koutou liliu ohage ko te ʼu kihiʼi tamaliki, pea ʼe mole feala anai hakotou hū ki te puleʼaga ʼo te ʼAtua. Ko ʼaē ʼe lahi ʼi te puleʼaga, ʼe ko ia ʼaē ʼe liliu ohage ko te kiʼi tamasiʼi ʼaenī.’ ʼE koutou ʼiloʼi pe koʼe neʼe ʼui e Sesu te meʼa ʼaia?
ʼE moʼoni ko te ʼu kiʼi tamaliki ʼe mole hoha tonatou loto pe ko ai ʼaē ʼe lahi age peʼe maʼuhiga age. Koia neʼe tonu ke hage te kau ʼapositolo ko te ʼu kiʼi tamaliki ʼi te faʼahi ʼaia, kae neʼe mole tonu ke nātou fefihiʼaki pe ko ai ia nātou ʼaē ʼe lahi ake peʼe maʼuhiga ake.
Neʼe toe ʼi ai foki mo te tahi ʼu lakaga neʼe fakahā ai e Sesu tona ʼofa ʼaē ki te ʼu kihiʼi tamaliki. Hili kiai ni ʼu māhina, neʼe ʼaumai e ʼihi hahaʼi tanatou ʼu tamaliki kia Sesu. Neʼe faiga te kau ʼapositolo ke nātou tāʼofi ia nātou. Kae neʼe ʼui age e Sesu ki tana ʼu ʼapositolo: ‘Koutou tuku te ʼu kiʼi tamaliki ke ʼōmai kia te ʼau, pea ʼaua naʼa koutou tāʼofi ia nātou, koteʼuhi ko te puleʼaga ʼo te ʼAtua ʼe maʼu e te ʼu hahaʼi ʼaē ʼe tatau mo te ʼu kiʼi tamaliki ʼaenī.’ Pea neʼe toʼo e Sesu te ʼu kihiʼi tamaliki ʼi ʼona nima, pea ina tapuakiʼi ia nātou. ʼE mole lelei koa la tatatou ʼiloʼi ʼaē neʼe ʼofa ia Sesu ki te ʼu kihiʼi tamaliki?