BIBIʼ Jesús caguʼdx mbioxien reʼ. Raduidyno cuent que rioʼbu galrasaʼ por mbioxien. Tipnés buñguieeu ni cabí xí ni cayac ngú xpiimbu. ¿Nanlo xí cayaiby Jesús layibu la?

Jesús né xpiin suusi bibiguetyibu de toib lagary. Ro sieedyibu ló néz xpiimbu godíldiitz. Por ngú, órni radxiinyibu Jesús ranabdiitz layibu: ¿Xigony godíldiitzto ló néz? Jesús nann xigony ngú godíldiitzyibu. Per láabu ranabdiitz par ganbu pal xpiimbu guiset.

Xpiimbu diti racapy, portín ló néz godíldiitzyibu chú ngú ni non guisanir lóoyibu. Tipnésyibu raniiny gac buñxirop ladyibu. ¿Ximod gaiby Jesús layibu que diti xinésni guisobladxyibu gacyibu buñxirop?

Jesús ragobioo toib mbioxien, né rasagaʼ láabu nisló guirá xpiin. Ór cú ranibu: Nainy naʼ guientzaayto ndeʼ: Pal diti ratzáto mod nacto né diti racto xomod toib mbioxien, diti sioʼto lainy Gobierno xtuny Dios. Buñ ni más buñxirop lainy Gobierno xtuny Dios ngú ni rac xomod mbioxien reʼ. ¿Nanlo xigony goní Jesús ndeʼ la?

Jesús goní ndeʼ portín mbioxien ni niyeʼensa diti rony pensary guisanir o gac buñxirop ló stipnés buñ. Por ngú xpiimbu non guisuidy gac xomod mbioxien, né modreʼ diti tíilyibu par gacyibu buñxirop.

Ló stoib ór láaca Jesús raslooybu balaati nadxibu mbioxien. Radudy chop tzón beʼo, tipnés buñ ritné xiin ronoʼ Jesús, per xpiimbu rayopy mod guicaa layibu par diti gonynutyibu Jesús, per láabu ranibu: Colguiduidy lagary guirá mbioxien guieed ronoʼya diti guicaato layibu, portín lainy Gobierno xtuny Dios rioʼ buñ ni nac xomod layibu. Ór cú raguʼdxbu guirá mbioxien, né Jesús raduidy xilaay layibu. ¿Diti sacró láani ganno ximod Jesús gondxiʼ guirá mbioxien la?