LIGBI ko Yesu de nyumu ko ke é suɔ e nyɛmi. Nyumu ɔ bi Yesu ke: ‘Mɛnɔ ji ye nyɛmi?’ Yesu le nɔ́ nɛ nyumu nɛ ɔ ngɛ susue. E susumi ji kaa nihi nɛ e kɛ mɛ je ma kake mi kɛ nihi nɛ e kɛ mɛ ngɛ jami kake mi pɛ ji e nyɛmimɛ. Lɔɔ he ɔ, ha nɛ waa hyɛ nɔ́ nɛ Yesu de lɛ.

Be komɛ ɔ, Yesu gbaa nihi sanehi nɛ e kɛ tsɔɔ mɛ ní. Ja ji bɔnɛ e pee ngɛ hiɛ ɔ. E gba Yudano ko kɛ Samariano ko he sane. Wa kase momo kaa Yudabi fuu sume Samariabi. Sane ɔ nɛ Yesu gba a ji nɛ ɔ nɛ:

Ligbi ko ɔ, Yudano ko hia blɔ kɛ gu yokuhi a kpɛ kɛ yaa Yeriko. Se ojo fiali ya tua lɛ ngɛ blɔ nɔ. A kpɔ e sika ngɛ e dɛ, nɛ a kongo lɛ kɛ ya si benɛ e gbo fã kɛ fã.

Pee se ɔ, Yudano osɔfo ko ba be ngɛ lejɛ ɔ. E na nyumu ɔ nɛ a plaa lɛ ɔ. Mɛni o susu kaa e pee? E gba kɛ ya gu blɔ kpa nɔ nɛ e je. Lɔɔ se ɔ, Mawu jalɔ kpa ko hu ba su lejɛ ɔ. Levino ji lɛ. Anɛ e da si lo? Dɛbi, lɛ hu e dɛ si konɛ e ye bua nyumu nɛ a plaa lɛ ɔ. Osɔfo ɔ kɛ Levino ɔ lɛ a yaa jee ngɛ blɔ nɔ ɔ nɛ.

Se hyɛ nɔ nɛ ngɛ nyumu nɛ a plaa lɛ ɔ he. Samariano ji lɛ. Nɛ e ngɛ Yudano ɔ ye buae. E ngɔ tsopa kɛ ngɛ e pa amɛ a nɔ fĩe ha lɛ. Lɔɔ se ɔ, e ngɔ Yudano ɔ kɛ ho he ko nɛ a hyɛɛ nihi a nɔ ngɛ ya konɛ e nyɛ nɛ e ná he wami.

Benɛ Yesu gba sane ɔ ta a, e bi nyumu ɔ nɛ bi lɛ munyu ɔ ke: ‘Nihi etɛ nɛ ɔmɛ a kpɛti mɛnɔ o susu kaa e ji nyumu nɛ a plaa lɛ ɔ nyɛmi? Osɔfo ɔ, loo Levino ɔ, loo Samariano ɔ?’

Nyumu ɔ ha heto ke: ‘Samariano ɔ. E pee nyumu nɛ a plaa lɛ ɔ kpakpa.’

Yesu de lɛ ke: ‘Bɔnɛ o de ɔ da. Lɔɔ he ɔ, yaa nɛ mo hu o ya pee ja nɔuu ngɔ ha ni kpahi kaa bɔnɛ nyumu ɔ pee ɔ.’

Anɛ o bua jɔɛ bɔnɛ Yesu tsɔɔ ní ha a he lo? Ke wa kase níhi nɛ Yesu de nɛ a ngma ngɛ Baiblo ɔ mi ɔ, wa maa le níhi fuu. Aloo pi ja?