KIÑE antü Jesu feypifi kiñe wentru: ‘Müley tami piwkeyeafiel tami chafche.’ Kidu ramtueyew: ‘¿Iney am tañi chafche?’ Jesu kimi chem ñi rakiduamkülen tüfachi wentru. Feychi wentru rakiduamkey kidu tañi trokiñ che, ka nielu tañi religion müten tañi chafche ngey, ka tañi karukatu. Feymu lle, peafiyiñ chem dungu feypieyew Jesu.

Kiñeke mu kimeltukey Jesu, nütramelkey kiñe nütram dungu. Femngechi femi fewla. Feypi kiñe nütram tati kiñe Judio wentru, ka kiñe Samaria wentru engu. Dew kimiyiñ fentren Judio che ayükelafi engün tati pu Samaria che. Tüfa amuley chi nütram:

Kiñe antü kiñe judio nagkülerpuy kiñe wingkul rüpü amualu ta Jeriko waria mew. Welu kiñeke wedañmache lefkontueyew. Müntuñmangey tañi plata, ka wülelkangey fey el-langümkünungey.

Fey wüla, kiñe saserdote judio rupay ti rüpü mu. Pefi ti wülelkangechi wentru. ¿Chem chumi pikeymi? Kañpüle rumey rüpü mew, ka amuley ñi trekalen. Fey mew ka che rupay, küme yenielu tañi religion. Fey ta kiñe Levi che. ¿Witrakünuwi? Femlay, witrakünuwlay rume ñi kelluafiel ti allfülechi wentru. Peafuymi ti saserdote ka Levi che pichi kamapu nagküleyngu ti rüpü mu.

Welu adkintufinge iney am müley ti wülelkangechi wentru engu. Fey ta kiñe Samaria che. Ka petu kellufi ti Judio che. Kidu tükulelfi kiñe lawen ñi allfen mew. Fey wüla, yefi ti Judio che ñi pepi ümañmatual ka tremoal (mongelal).

Aflu tañi nütram, Jesu feypifi tati ramtulu: ‘¿Chuchi am tüfachi küla wentru chafcheyefi kam karukatuyefi ti wülelkangechi wentru? ¿Tati saserdote, tati Levi che, kam tati Samaria che?’

Ti wentru llowdungueyew: ‘Tati Samaria che. Kidu kümelkafi ti wülelkangechi wentru.’

Jesu feypi: ‘Feyngey tami feypiel. Feymu lle, amunge, ta eymi ka femngechi femafimi kakelu pu che.’

¿Ayülafimi chumngechi Jesu kimeltukefi ta che? Allkütufiliyiñ Jesu ñi dungu Biblia mu, kimafuyiñ fentren falin-ngechi (manelfalchi) dungu, ¿feyngelay?