Maana 95nan

Yesu ka mɔgɔ kalancogo

DON dɔ, Yesu y’a fɔ cɛ dɔ ye ko a ka kan ka a mɔgɔɲɔgɔn kanu. Cɛ ye Yesu ɲininka: ‘Jɔn ye ne mɔgɔɲɔgɔn ye?’ Cɛ hakilila tun ye min ye o ko la, Yesu tun bɛ o dɔn. Cɛ hakili la, mɔgɔ min ni ale ye siya kelen ye ani diinɛ kelen ye, o tigi de ye a mɔgɔɲɔgɔn ye. Nka, Yesu ye min fɔ cɛ ye, an ka o lajɛ ɲɔgɔn fɛ.

Yesu tun bɛ mɔgɔw kalan tuma dɔw la maanaw fɛ. A bɛ ka o ɲɔgɔn de kɛ yan. A ye maana dɔ fɔ Yahutu ni Samarika dɔ kan. An y’a kalan ka tɛmɛ ko Yahutu fanba tɛ Samarikaw fɛ. Yesu ka maana filɛ:

Don dɔ, Yahutu dɔ tun bɛ ka jigin kulu sira fɛ ka taa Jeriko. Nsonw binna a kan yen. U y’a ka wari minɛ a la, ka a bugɔ fo a tun bɛ ɲini ka sa.

Kɔfɛ, Yahutu dɔ nana tɛmɛ o sira fɛ. Sarakalasebaga tun don. A ye cɛ bugɔlen dalen ye. E fɛ, a bɛna mun kɛ? Yahutucɛ tɛmɛna sira fan dɔ fɛ, ka taa. O kɔfɛ, mɔgɔ dɔ wɛrɛ min ka alako ka bon kosɛbɛ, n’o tun ye levite dɔ ye, o nana tɛmɛ o sira kelen fɛ. Yala a bɛna a jɔ wa? Ayi. Ale fana m’a jɔ ka cɛ bugɔlen dɛmɛ. I ɲɛ bɛ sarakalasebaga ni levite de la, u bɛ ka jigin sira fɛ ka taa.

Nka, e k’a lajɛ mɔgɔ min ni cɛ bugɔlen bɛ ɲɔgɔn fɛ. Samarika dɔ don. A bɛ ka Yahutucɛ dɛmɛ, ka fura kɛ a jogindaw la. O kɔfɛ, Samarika ye Yahutucɛ ta ka taa a bila yɔrɔ la, a bɛna se ka lafiya, ani ka kɛnɛya yɔrɔ min na.

Yesu tilala a ka maana na tuma min na, cɛ min tun ye Yesu ɲininka ko jɔni ye ale mɔgɔɲɔgɔn ye, Yesu ye o cɛ ɲininka ko: ‘E hakili la, nin mɔgɔ saba la, jɔni kɛra cɛ  bugɔlen mɔgɔɲɔgɔn ye? Sarakalasebaga don wa, walima levite, walima Samarika?’

Cɛ y’a jaabi ko: ‘Samarikacɛ don, bawo ale de ɲɛna a ma.’

Yesu ko: ‘O don tigitigi. E fana ka tɔw minɛ o cogo kelen na.’

Yesu bɛ mɔgɔw kalan cogo min na, o ka di i ye wa? Yesu ye kuma minnu fɔ Bibulu kɔnɔ, ni an bɛ an ɲɛmajɔ k’olu lamɛn, an bɛ se ka fɛn nafama caman-caman dɔn. O tɛ tiɲɛ ye wa?

Luka 10:​25-37.