Larufudahan Hesusu
Abahüdaguni 95
Larufudahan Hesusu
LUAGU aban weyu aba lariñagun Hesusu lun aban wügüri mosu lan línsiñedun líbiri lun. Aba lálügüduni: ‘Katei san níbiribei?’ Subudi lumuti Hesusu ka lan laritagubei wügüri le, saminati hárügüñanu lan gürigia lídangiñe lirasan o lani relihión líbiribaña o libesina. Ligíati, ariha waméi ka lan lariñagubei Hesusu.
Anihein dan arufudahati Hesusu lau hénpulu. Abahüdaguati luagu aban huríu luma aban samariana. Furendeihadiwa luagu mínsiñe hamá samariana houn hibe-agei huríu.
Luagu aban weyu, laragachuña aban huríu luéigiñe aban ǘma lun uburugun Herikó. Aba hárügüdüni híwerutiña. Aba híweruhani liseinsun ani bulesei haméi aba hígiruni hilamémeeli.
Murusun dan lárigiñe, aba lásügürün aban fádiri huríu lídangiñememe ǘma ligía. Ariha lumuti wügüri buleseiwaali. Ka san ladügübei? Aba legeyedun luagun le aban oubaü aba lasigiruni léibugun. Ábati lásügürün aban lewita. Ráramati san? Uá, mararamunti giñe íderaguei wügüri ligía. Gayarati barihini fádiri luma lewita dise, lidan ǘma ǘnabu.
Gama lumoun arihabei katei lan lúmabei buleseiwaali. Aban samariana líderaguñein huríu. Aba lagaranihan lun biti burí le luágubei. Lárigiñe, aba lanügüni le ñein lubéi gayara lan lemeeragun ani areidagua ligíame.
Dan le lagumuchuni Hesusu abahüdaguni, aba lálügüdüni wügüri: ‘Kagia hádangiñe ǘrüwa wügüriña ha arufudubalin luagu líbiri lan o libesina lan buleseiwaali? Fádiri, lewita, o samariana?’
Aba lóunabun wügüri: ‘Samariana. Ligía buidubei luma wügüri buleseiwaali.’
Aba lariñagun Hesusu: ‘Binarün. Ligíati, beiba ani ligiamemelá badüga houn amu gürigia.’
Ma hínsiñeti ligaburi larufudahan Hesusu bun? Gayarati wafurendeirun gíbeti katei súdiniti lídangiñe le lariñagubei Hesusu, tidan Bíbülia, adián?
