EN ZOUR Zezi ti dir avek en zonm ki i devret kontan son prosen. Sa zonm ti demann Zezi: ‘Lekel mon prosen?’ Byen, Zezi ti konnen ki sa zonm ti pe mazinen. Sa zonm ti krwar ki zis dimoun ki reste dan menm pei avek li e ki dan menm larelizyon avek li ki son prosen. Annou vwar ki Zezi ti dir li.

Parfwa Zezi ti ansennyen par rakont en zistwar. Se sa ki i ti fer la. I ti rakont en zistwar lo en Zwif ek en Samariten. Nou’n deza vwar ki bann Zwif pa ti kontan bann Samariten. Alor la zistwar ki Zezi ti rakonte:

En zour ti annan en Zwif ki ti lo son semen pe al Zeriko. Me bann bandi ti sot lo li. Zot ti pran son larzan e zot ti bat li ziska ki i ti pros pour mor.

Plitar, en pret Zwif ti pe pase lo sa semen. I ti vwar sa zonm ki’n ganny bate. Ki ou krwar i ti fer? I ti koup lo lot kote semen e kontiny son semen. Apre en lot zonm ki li osi i ti relizye ti vini. I ti en Levit. Eski i ti arete? Non, li osi i pa ti arete pour ed sa zonm ki ti’n ganny bate. Ou kapab vwar sa pret ek sa Levit ki pe kontiny zot semen.

Me gete lekel ki la avek sa zonm ki’n ganny bate. I en Samariten. I pe ed sa Zwif. I pe met en pe latizann lo son blesir. Apre sa, i ti anmenn sa Zwif dan en landrwa kot i ti kapab repoze e geri.

Apre ki i ti’n fini rakont sa zistwar, Zezi ti dir avek sa zonm ki ti’n demann li sa kestyon: ‘Lekel parmi sa trwa zonm ki ou krwar in reazir konman prosen sa zonm ki’n ganny bate? Eski ti sa pret, sa Levit oubyen sa Samariten?’

Sa zonm ti reponn: ‘Sa zonm Samariten. I ti bon avek sa zonm ki’n ganny bate.’

Zezi ti dir: ‘Ou’n reponn byen. Alor ale e tret lezot parey sa zonm Samariten in fer.’

Pa ou kontan fason ki Zezi ti ansennyen? Nou pou kapab aprann en kantite keksoz si nou ekout sa ki Zezi ti dir dan Labib.