Lehe Jesu Nọ Plọnmẹ Do
OTÀN 95
Lehe Jesu Nọ Plọnmẹ Do
TO GBÈDOPO, Jesu dọna dawe de dọ ewọ dona yiwanna kọmẹnu etọn. Dawe lọ kanse Jesu dọmọ: ‘Mẹnu wẹ yin kọmẹnu ṣie?’ Jesu yọ́n nuhe lẹn dawe lọ te ganji. Dawe lọ lẹndọ mẹhe tin to akọ̀ po sinsẹ̀n emitọn po mẹ lẹ kẹdẹ wẹ yin kọmẹnu emitọn lẹ. Enẹwutu gbọ mí ni pọ́n nuhe Jesu dona ẹn.
To whedelẹnu, Jesu nọ plọnmẹ gbọn otàn de yiyizan dali. Nuhe e wà todin niyẹn. E dọ otàn de he gando Ju de po Samalianu de po go. Mí ko plọn wayi dọ suhugan Ju lẹ tọn ma yiwanna Samalianu lẹ. Otàn he Jesu dọ lọ die:
To gbèdopo, Ju de gbọn aliho osó tọn de ji jei Jẹliko. Ṣigba ajotọ lẹ jẹ e ji. Yé yí akuẹ etọn lẹpo bosọ hò e bọ e dibla kú.
To ojlẹ de godo, yẹwhenọ Ju de gbọn aliho lọ ji bo mọ dawe he yè hò kúdaa-gbẹ̀daa lọ. Etẹwẹ hiẹ lẹndọ e wà? E haji lẹkọ gbọn awà awetọ ji bo yì. Enẹgodo, dawe sinsẹ̀nnọ de sọ gbọn filọ. Levinu de wẹ ewọ. Be e nọte ya? Lala, ewọ lọsu ma nọte nado gọalọna dawe he yè hò kúdaa-gbẹ̀daa lọ gba. Hiẹ sọgan mọ yẹwhenọ lọ po Levinu lọ po he to yìyì to aganu to aliho lọ ji.
Ṣigba pọ́n mẹhe tofi hẹ dawe he yè hò kúdaa-gbẹ̀daa lọ. Samalianu de wẹ. Podọ ewọ to alọgọna Ju lọ. E to amasin delẹ kọ̀n do apà dawe lọ tọn lẹ mẹ. Enẹgodo, e ze Ju lọ yì fihe yè sọgan penukundo e go te na nido jẹgangan.
Whenuena e dotana otàn etọn, Jesu dọna dawe he kàn kanbiọ sè e lọ dọmọ: ‘Mẹnu to omẹ atọ̀n ehelẹ mẹ wẹ hiẹ lẹndọ e do ede hia taidi kọmẹnu de na dawe he yè hò kúdaa-gbẹ̀daa lọ? Be yẹwhenọ lọ, Levinu lọ kavi Samalianu lọ wẹ ya?’
Dawe lọ gblọn dọmọ: ‘Samalianu lọ wẹ. E do homẹdagbe hia dawe he yè hò kúdaa-gbẹ̀daa lọ.’
Jesu dọmọ: ‘Hiẹ dọ dagbe. Enẹwutu, yì bo nọ wà nudopolọ na mẹdevo lẹ.’
Be hiẹ ma yiwanna lehe Jesu nọ plọnmẹ do ya? Mí sọgan plọn onú titengbe susu eyin mí nọ dotoaina nuhe Jesu dọ to Biblu mẹ lẹ, kavi e ma yin mọ wẹ?
A Gán Sọ Pọ́n Hosọ Ehelẹ
JESU—ALIHO LỌ, NUGBO LỌ PO OGBẸ̀ PO
Samalianu de Do Mẹhe Yin Kọmẹnu Nujọnu Tọn de Hia
Nawẹ Jesu yí oló kọmẹnu Samalianu lọ kavi “Samalianu dagbe” lọ tọn zan nado na nuplọnmẹ he whànmẹ taun de gbọn?
JESU—ALIHO LỌ, NUGBO LỌ PO OGBẸ̀ PO
Visunnu He Ko Bu lọ Lẹkọwa
Etẹlẹ wẹ mí sọgan plọn sọn apajlẹ Jesu tọn gando visunnu duvanọ lọ go mẹ?
