MAYSA nga aldaw kuna ni Jesus iti maysa a lalaki nga ayatenna dagiti kaarrubana. Ti lalaki nagsaludsod ken Jesus: ‘Asino ti kaarrubak?’ Ammo ni Jesus ti pampanunoten daytoy a lalaki. Pampanunoten ti lalaki a dagiti laeng tattao iti mismo a rasa ken relihionna dagiti kakaarrubana. Gapuna kitaentayo no aniat’ imbaga ni Jesus kenkuana.

Nagistoria maipapan ti maysa a Judio ken Samaritano. Ammotayon a kaaduan a Judio saanda a kaykayat dagiti Samaritano. Adtoy ti estoria ni Jesus.

Maysa nga aldaw adda Judio a sumalsalog iti maysa a kalsada nga agturong Jerico. Ngem isut’ sinaneb dagiti mannanakaw. Innalada ti kuartana ket sada minalmalo agingga a dandani matay.

Kalpasanna, maysa a padi a Judio ti nagna iti dayta a kalsada. Nakitana daydiay lalaki. Aniat’ pagarupmo nga inaramidna? Isut’ bimmallasiw laeng iti bangir ti kalsada ket sa nagtultuloyen iti dalanna. Idi kuan adda maysa manen nga immay. Maysa a Levita. Uray isu di met nagsardeng. Makitamon ti padi ken ti Levita idiay adayo.

Ngem asino daydiay maysa a tumultulong iti tao a tinulisanda? Isut’ maysa a Samaritano. Agagasanna dagiti sugatna. Kalpasanna impanna ti Judio iti lugar a mabalinna a paginanaan ken pagpaimbaganna.

Idi nalpasnan ti estoriana, kuna ni Jesus: ‘Asino kadagitoy a tallo ti kunam nagtignay kas kaarruba ti tao a tinulisanda?’

Simmungbat ti lalaki: ‘Ti Samaritano. Isut’ naasi iti daydiay tao a tinulisanda.’

Kuna ni Jesus: ‘Husto. Inka ngarud ket tratuem dagiti dadduma kas ti inaramidna.’

Dika kadi kayat ti wagas a panangisuro ni Jesus?