Aselmed ixulfen akk wiyaḍ
TAQSIṬ TIS 95
Aselmed ixulfen akk wiyaḍ
YIWEN wass, Ɛisa yenna i leflani: ‘Ilaq aţ-ţḥemmleḍ lɣir-ik.’ Neţţa yerra-yas: ‘Anwa i d lɣir-iw?’ Ɛisa yeẓra d acu yeţxemmim wergaz-agi. Yeẓra belli ɛlaḥsab-is, ḥaca win yellan si ccetla-s d win yellan si ddin-is i d lɣir-is. A nwali ihi d acu i s-yerra.
Tikwal Ɛisa yesselmad lɣaci s temɛayin. D ayen ara yexdem tura. A d-iḥku yiwet n teqsiṭ ɣef yiwen n Wuday d yiwen n wat Cumrun. Akken i t-id-nenna yakan, azgen ameqran n Wudayen keṛhen At Cumrun. Aţah tura teqsiṭ n Ɛisa:
Yiwen n Wuday, iɛedda adrar iwakken ad iṛuḥ ɣer temdint n Yariḥu (Yiriku). Deg webrid, sqiṭṭɛen-as imakaren. Kksen-as idrimen-is, wten-t armi qrib yemmut.
Kra n lweqt umbeɛd, iɛedda-d syenna yiwen n Wuday yellan d lmuqeddem. Iwala deg webrid argaz-nni ijerḥen. Teẓriḍ d acu yexdem? Iɛedda si tama nniḍen, ikemmel abrid-is. Ataya wergaz nniḍen iṭṭfen mliḥ di ddin, yellan seg wat Lewwi. I neţţa, yeḥbes ɣur-es? Xatị, ur yeḥbis ara iwakken ad iɛiwen argaz-nni ijerḥen. Twalaḍ lmuqeddem d wergaz-ihin n wat Lewwi iţkemmilen abrid-nsen?
Lameɛna anwa-t wagi yeqqimen ɣer tama n Wuday-agi ijerḥen? D yiwen n tmurt n Cumrun. Atan la yeţdawi leǧruḥ-is. Mi gfukk, yewwi-t ɣer yiwen wemkan anda ara yaf ḥellu d westeɛfu.
Mi tekfa teqsiṭ, Ɛisa yenna i wergaz-nni i t-isteqsan: ‘Ɛlaḥsab n lefɛayel-nsen, anwa i gellan d lɣir n umejruḥ-nni? D lmuqeddem-nni, d argaz-nni n wat Lewwi neɣ d win akken yellan seg wat Cumrun?’
Argaz-nni yerra-yas: ‘D win akken yellan seg wat Cumrun. Iḥunn fell-as yerna ixdem-as lxiṛ.’
Ɛisa yenna-yas: ‘Tesɛiḍ lḥeqq. Ṛuḥ ula d kečč xdem akken.’
Iɛǧeb-ak wamek yesselmad Ɛisa? Tzemreḍ aţ-ţḥefḍeḍ aṭas aṭas n leḥwayeǧ i gesɛan azal ameqran ma yella tesmeḥsiseḍ i wayen i d-iqqar Ɛisa deg Wedlis Iqedsen.
