LANI mi hta e, Yesu gaw masha langai mi hpe, tinang a htingbu wa hpe tsaw ra ra ai lam tsun dat ai. Dai wa gaw: ‘Tinang a htingbu wa gaw, kadai rai ta?’ nga nna Yesu hpe san ai. Ndai wa hpa myit yu nga sai, hpe Yesu chye ai. Dai masha wa gaw tinang amyu, tinang hte makam masham bung ai wa sha htingbu wa re, nga nna myit la ai. Dai rai nna Yesu gaw shi hpe hpa tsun ai hpe chye a ni?

Yesu gaw kalang lang maumwi ni hkai dan nna, sharin shaga chye ai. Ya mung dai zawn galaw ai. Yuda masha langai mi hte Samari masha langai mi a maumwi hpe hkai dan ai. Yuda masha law malawng gaw Samari masha ni hpe nra ma ai lam hpe anhte chye saga ai. Yesu hkai dan ai maumwi gaw ning nga ai:

Lani mi hta e Yuda masha langai mi gaw, Yerihko mare de sa wa na matu, bum lam kaw na yu wa ai. Damya ni shi a gumhpraw ni hpe kashun la kau ma ai. Shi hpe mung ganoi si hkra gayat tawn ma ai.

Dai hpang e Yuda masha hkinjawng langai dai lam hku nna lai wa ai. Gayat hkrum ai dai masha wa hpe mu ai. Shi hpa galaw na myit zawn nawn a ni? Koi kau nna kaga lam hku hkawm mat wa ai. Dai hpang makam masham hpe grai hkungga ai masha langai mung dai lam hku bai lai sa wa ai. Dai wa gaw Lewi masha re. Shi hkring tsap a ni? Nhkring ai. Damya hkrum ai wa hpe hpa mung n-karum ai. Hkinjawng wa hte Lewi masha wa tsan tsan e, hkawm nga ma ai hpe mu a ni?

Raitimung gayet hkrum ai wa a makau e, kadai wa du nga ai hpe yu dat mu. Dai wa gaw Samari masha langai mi re. Yuda masha wa hpe karum lajang nga ai. Nama hkang hta atsi bang ya nga ai. Bai nna Yuda masha wa hkring sa lu nna, tsi shamai la lu na shara de woi lakawn htaw mat wa ai.

Yesu gaw ndai maumwi hpe hkai dan ngut ai hte, shi hpe ga san san ai wa hpe tsun ai: ‘Dai masha ni kaw na damya hkrum ai wa a ntsa e, tinang a htingbu majing zawn galaw ai wa gaw kadai mahtang rai na zawn nawn a ni? Hkinjawng wa mahtang wa kun? Lewi masha wa kun? Shing rai Samari masha wa mahtang kun?

Dai wa gaw: ‘Samari masha wa mahtang rai nga ai. Shi gaw damya hkrum ai masha wa hpe matsan dum ai,’ nga nna bai htan ai.

Yesu gaw, ‘nang tsun ai ga teng ai. Dai rai nna nang mung kaga masha wa hpe dai masha wa zawn galaw u,’ nga nna bai htai ya ai.

Yesu sharin ai lai masa hpe nanhte nra sharawng ma ni? Chyum Laika kaw e, Yesu tsun tawn ai ga ni hpe anhte madat yang manu dan ai lam ni law law chye la lu ai. Teng ai n re a ni?