KƖYAKƲ nakʋyʋ Yesu heyi abalʋ nɔɔyʋ se pʋpɔzʋʋ se ɛsɔɔlɩ e-koobu. Abalʋ ɛnʋ ɛpɔzɩ Yesu se: ‘Anɩ lɛ mon-koobu?’ Toovenim taa lɛ, Yesu sɩm ndʋ abalʋ ɛnʋ ɛmaɣzaɣ yɔ. Ɛmaɣzaɣ se ɛ-ɛjaɖɛ taa mba nɛ mba pɛwɛ ɛ-Ɛsɔ sɛtʋ ɛgbɛyɛ taa yɔ, pe-yeke pɛkɛnɩ e-koobiya. Yele nɛ ɖɩna ndʋ Yesu heyi-i yɔ.

Ðoŋ ɖoŋ lɛ, Yesu wɩlaɣnɩ aduwa. Mbʋ ɖɔɖɔ ɛlabɩ lɛɛlɛɛyɔ. Etuu eduuye naɖɩyɛ. Nɛ ɖɩ-taa lɛ, ɛyɔɔdɩ Yuda tʋ nɛ Samaarɩɩ tʋ nɔɔyʋ pɔ-tɔm. Ɛzɩ ɖɩɩtɛm kpɛlɩkʋʋ yɔ, Yuda mba tɩsɔɔlɩ Samaarɩɩ mba. Yesu eduuye yɔ:

Kɩyakʋ nakʋyʋ Yuda tʋ nɔɔyʋ kʋyɩ Yerusalɛm, nɛ etiki pʋʋ se ewolo Yeriko. Ɛlɛ, ɛtɔlɩ mɩlaa nabɛyɛ nesi tɛɛ. Pamʋ e-liidiye nɛ pamabɩ-ɩ nɛ pɩkazɩ-ɩ fezuu ɖalaa.

Pʋwayɩ lɛ, Yuda cɔjɔ nɔɔyʋ tɩŋ nʋmɔʋ ŋgʋ. Ɛna abalʋ weyi pamabɩ-ɩ yɔ lɛ, ŋsɩm mbʋ ɛlaba yɔ? Ɛtɛzɩ habɩyɛ nɛ ɛkpaɣ nʋmɔʋ lɛɛkʋ. Ɛlɛ wayɩ lɛ, Ɛsɔ sɛyʋ sɔsɔ nɔɔyʋ tɩŋ ɖɔɖɔ nʋmɔʋ ŋgʋ. Ɛkɛ Leevi tʋ. Ɛlɛ sɩŋaa? Aayɩ, ɛlɛ ɖɔɖɔ tɩsɩŋ se ɛsɩnɩ weyi pamabɩ-ɩ yɔ. Ŋpɩzɩɣ ŋna kɩlɛmʋʋ yɔɔ cɔjɔ nɛ Leevi tʋ paɖiɣni ɖɛʋ.

Ɛlɛ na weyi eɖiɣni sɩnaʋ abalʋ weyi pamabɩ-ɩ yɔ. Ɛkɛ Samaarɩɩ tʋ, ɛlɛ ɛwɛɛ ɛsɩɣnɩ Yuda tʋ. Eɖiɣni ɖʋʋ kɔyɛ naɖɩyɛ e-heŋ taa. Pʋwayɩ lɛ, ewoni Yuda tʋ ɛnʋ lone naɖɩyɛ nɖɩ ɖɩ-taa ɛpɩzɩɣ ɛhɛzɩ nɛ ɛ-yɔɔ cɛ yɔ.

Eduuye tɛma lɛ, Yesu heyi abalʋ weyi ɛɛpɔzɩ-ɩ tɔm yɔ se: ‘Pa-naadozo pa-taa lɛ, akɛ abalʋ weyi  ɛtɔlɩ mɩlaa nesi tɛɛ yɔ, e-koobu? Cɔjɔ yaa Leevi tʋ yaa Samaarɩɩ tʋ?’

Abalʋ ɛnʋ ecosi se: ‘Samaarɩɩ tʋ. Mbʋ pʋyɔɔ yɔ ɛna abalʋ weyi pamabɩ-ɩ yɔ, ɛ-pʋtɔdɩyɛ.’

Peeɖe Yesu heyi-i se: ‘Ŋwɛnɩ toovenim. Ña ɖɔɖɔ wolo nɛ ŋla mbʋ.’

Ɛzɩma Yesu wɩlɩɣ tɔm yɔ, pɩkɛdɩnɩ-ŋ? Ðɩkpɛlɩkɩɣ wondu kɩbandʋ sakɩyɛ ye ɖiwelisiɣ ndʋ Yesu yɔɔdʋʋ Bibl taa kɔyɔ.