SAʼ JUN kutan li Jesus kixye re jun li winq naq tento tixra li ras riitzʼin. Li winq kixpatzʼ re li Jesus: ‹Ani li was wiitzʼin?› Li Jesus naxnaw naq li winq aʼin, yook xkʼoxlankil naq li ras riitzʼin aʼan li rechtenamitul ut li rechpaabʼal. Qatzolaq kʼaru kixye li Jesus re li winq.

Li Jesus kikʼutuk rikʼin eetalil. Joʼkan naq kiʼaatinak chirix jun laj Judio ut jun laj Samaria. Xqatzol naq ebʼ laj Judio ut ebʼ laj Samaria inkʼaʼ nekeʼraatina ribʼ. Aʼin kixye li Jesus.

Saʼ jun kutan, jun laj Judio yook chi xik saʼ li tenamit Jerico, naq kichapeʼk xbʼaanebʼ laj elqʼ. Keʼxmaqʼ li xtumin, keʼxteni ut kachʼin chik ma keʼxkamsi.

Saʼ li bʼe aʼin kinumeʼk jun laj tij, aj Judio, kiril li winq chi tʼantʼo. Abʼan, ma kixtenqʼa li winq? Inkʼaʼ, yal kinumeʼk chiru ut xko! Chirix chik aʼan kichalk jun laj Levita, aj paabʼanel. Kʼaru nakaaye, ma kixtenqʼa tawiʼ li winq? Inkʼaʼ kixtenqʼa li winq. Saʼ li eetalil nakʼutunk naq laj tij ut laj Levita kohebʼ.

Ma nakaanaw ani yook chi tenqʼank re laj Judio? Li winq aj Samaria yook xbʼanbʼal laj Judio. Ut kixsikʼ xnaʼaj li winq aʼin re naq thilanq ut tkʼiraaq.

Naq li Jesus kiraqeʼk xseeraqʼinkil aʼin, kixye re li winq, li kixbʼaanu li patzʼom re: ‹Anaqwan ye we, ani rehebʼ li oxibʼ chi winq aʼin, nakaakʼoxla naq aʼan tzʼaqal ras riitzʼin li kichapeʼk xbʼaanebʼ laj elqʼ? Ma laj tij, laj Levita malaj laj Samaria?›

Li winq kixye re li Jesus: ‹Laj Samaria, li kitenqʼank re laj Judio›.

Tojaʼ naq li Jesus kixye re li winq: ‹Yaal nakaaye. Joʼkan naq aayu ut yuʼami li kixbʼaanu laj Samaria›.

Chʼinaʼus kikʼutuk li Jesus! Peʼyaal? Laaʼo naru tqatzol naabʼal li naʼlebʼ saʼ li Santil Hu. Xbʼaan naq aran wank chixjunil li kixbʼaanu li Jesus.