EFIKU limwe, Jesus okwa li a lombwela omulumenhu wonhumba kutya oku na okukala e hole mukwao ile tu tye ovanhu vakwao. Omulumenhu oo okwa li a pula Jesus a ti: ‘Mukwetu olyelye?’ Jesus okwa li e shi shii kutya omulumenhu oo ota diladila shike. Omulumenhu oo okwa li ta diladila kutya ovanhu vomuhoko wavo nosho yo velongelokalunga lavo ovo ashike oovakwao. Natu ka taleni kutya Jesus okwa li a lombwela shike omulumenhu oo.

Jesus okwa li ha hongo ovanhu oilihongomwa yonhumba ta hokolola omahokololo. Okwa li a hokololela omulumenhu oo ehokololo li na sha nOmujuda nosho yo Omusamaria. Otwe lihonga nale kutya Ovajuda vahapu kava li ve holafane nOvasamaria. Ndele Jesus okwe mu hokololela ehokololo tali ti:

Efiku limwe, Omujuda wonhumba okwa li ta ende mondjila ya kunghula pomhunda ya finda kuJeriko. Ohaluka, ovanyeki ove mu ponokela, ndele tave mu nyeke oimaliwa yaye nove mu denga fiyo hanga a fya.

Konima yaasho, omupristeri Omujuda okwa li ta ende mondjila oyo nokwa mona omulumenhu oo a dengwa kovalunga. Mbela ou shi shii kutya omupristeri okwa li a ninga po shike? Okwa enda po ashike, ndele ta i nondjila yaye. Opo nee, omulumenhu umwe Omulevi oo a li a lenga elongelokalunga okwe uya ta ende nondjila oyo tuu oyo. Mbela Omulevi okwa li ngoo a kanghama opo a kwafele omulumenhu oo a li a dengwa? Ahowe! Oto dulu okumona mefano olo nghee omupristeri nOmulevi tava ende kokule kwinya va lambalala ondjila.

Ndele tala kutya olyelye oo e li nomulumenhu oo a dengwa. Omusamaria ta kwafele Omujuda. Ota xu omuti poipute yaye. Opo nee, Omusamaria oo okwa twala Omujuda oo a li a dengwa konhele oko ta dulu oku ka tulumukwa noku veluke.

Eshi Jesus a mana ehokololo laye, okwa pula omulumenhu oo a li e mu pula kutya mukwetu olyelye, a ti: ‘Elipipo womwaavo vatatu to diladila kutya okwa katuka ngaashi mukwao womulumenhu oo a li a dengwa? Omupristeri ile Omulevi ile Omusamaria?’

Omulumenhu okwa nyamukula a ti: ‘Omusamaria, molwaashi oye a kwafela omulumenhu oo a li a dengwa.’

Jesus okwa ti kuye: ‘Ou li mondjila. Naave yo inda u ka ninge ngaho.’

Mbela ku hole onghedi omo Jesus a li ha hongo ovanhu? Ohatu dulu okulihonga oinima ihapu ya fimana ngeenge otwa pwilikine kwaasho Jesus a popya mOmbibeli, hasho mbela?