Chihande 95

Mweji Kunangulanga Yesu

LIKUMBI limwe Yesu mwalweza lunga umwe nge azangenga vakwavo. Ou lunga mwahulisa Yesu ngwenyi: ‘Iyaze ou napu mukwetu?’ Enga, Yesu nejiva vyanakushinganyeka ou lunga. Ou lunga anakushinganyeka nge, vakwavo shina vatu vamuyachi wenyi namukwitava chenyi, ngu. Shikaho tuwanenu vinavamulweza kuli Yesu.

Shimbu jimwe Yesu eji kunangula navishimo. Mukiko mwalinga jino. Himwambulula chishimo chakaYuleya nakaSamaliya. Twalinangulanga lyehi nge vaYuleya vavavulu kavasaka vaSamaliyako. Chamwaza, chishimo chaYesu chikiko chino:

Likumbi limwe kwapwile kaYuleya apwile nakushikumuka mujila yakupili, yakuya kuYeliko. Kaha vihwanga vamulukukile. Vamunyangile jimbongo jenyi nakumupupula nakumuseza nalezumuka.

Jino, kwejile kapilishitu wavaYuleya mujila yize. Amumwene mutu vanavete. Washinganyeka ngwove alingile ngachilihi? Woho, hikumukondoloka nakuliyila kwenyi. Kaha kwejile nawa mutu mukwavo muka-kwitava chikuma. Apwile kaLevi. Uno emanyine nyi? Nduma, nayikiye kemanyine nakukafwa mutu vanaveteko. Tala kapilishitu nakaLevi vaze vanakushikumuka mujila.

Tala jino ou ali namutu vanavete. Ou hikaSamaliya. Ali nakukafwa kaYuleya. Anakumuhaka vitumbo hajimbandu. Kufumaho, hikutwala ou kaYuleya kuchihela atela kutwama mangana ayoye kanawa.

Omu nakumisa chishimo chenyi, Yesu himwamba kuli ou lunga ahulisanga chihula, ngwenyi: ‘Kuli vaze vatatu, ove ngwove iyaze ou apwile mukwavo wayauze mutu vavetele? Uno kapilishitu tahi, nyi kaLevi, nyi kaSamaliya?’

Ou lunga ngwenyi: ‘KaSamaliya. Ikiye atetelele uze lunga vavetele.’

Yesu ngwenyi: ‘Unahanjika mwakwoloka. Shikaho yako ukalingenga ngocho nayove nawa.’

Wasaka jila eji kunangwilangamo Yesu nyi? Tunahase kulinangula vyuma vyavilemu vyavivulu kachi nge natwivwilila kuvize ahanjika Yesu muMbimbiliya, ngwetu?

Luka 10:25-37.