JUN maj, xi tqʼamaʼn Jesús te jun xjal tuʼn tok tkʼujlaʼn t-xjalil. Xi tqanin xjal: ‹¿Alkyetzunju wukʼile moqa nxjalile?› Ojtzqiʼnteq tuʼn Jesús alkyetoq t-xim xjal. Nkubʼtoq t-ximin qa oʼkx qejo junx kyajil tukʼe, ex junx kyokslabʼil tukʼil oʼkxqetzen t-xjalilju. Qo xnaqʼtzal tiʼ xi tqʼamaʼn Jesús te xjal.

At maj nche kubʼtoq t-xnaqʼtzaʼn Jesús xjal tukʼe jun txʼolbʼabʼil. Ik bʼent tuʼn toj jun maj. Xi tqʼmaʼn jun txʼolbʼabʼil aju nyolintaq tiʼj jun xjal judiy ex jun xjal te Samaria. O tzʼel qnikʼ qa nelteq kyikʼen kyibʼ judiy ex qe aj Samaria. Atzen txʼolbʼabʼel jlu:

Jun maj, kux bʼet jun judiy tiʼj witz tuʼn tkuʼpin tuj Jericó. Naqtzen tuʼnj tzyet kyuʼn eleqʼ tuj bʼe. El kyiʼn tpwaq ex bʼaj kybʼujuʼn, kyaj kyqʼoʼn tzmaxi tej chʼixtaq tkyim.

Yajxitl, kuʼx jun pal toj bʼe. Ok tkiʼn xjal otaq bʼaj kʼixbʼisaʼn. ¿Tiʼtzele bʼant tuʼn? Naq ikʼ ttxlaj bʼe ex mintiʼ weʼ. Ax ikx kuʼx jun xjal okslal. Jun aj Levítaq. ¿Weʼpetzulo xjal lu? Ax ikx mitiʼ weʼ tuʼn tonin tiʼj xjal. Ntila pal ex aj Leví luqe chi kuʼpin tzma chix.

Keʼyinka jaʼle alkye tok ttxlaj xjal ma bʼaj bʼiyoʼn. Jun aj Samaria te xjal lu. Nonin tiʼj xjal judiy ex nok tqʼanen. Ax ikx, xi tiʼn tuj jun ja tuʼn tojlan ex tuʼn tbʼanix.

Tej tbʼaj tqʼamaʼn Jesús txʼolbʼabʼil lu, xi tqanin teju xjal tzaj tqanin t-xjel te: ‹¿Alkye jun kyxol qeju oxe xjal lu ok te t-xjalil, mo tukʼil, xjal aju tzyet kyuʼn eleqʼ? ¿Aju pal, aju aj Leví, mo aju aj Samaria?›

Xi ttzaqʼweʼn xjal: ‹Aju aj Samaria. Tuʼnjo tbʼanel bʼent tuʼn tukʼejo xjal bʼaj bʼiyoʼn›.

Xi ttzaqʼweʼn Jesús te: ‹Ikju, txiʼya ex bʼinchama ik tzeʼn jlu kyukʼil kykyaqil xjal›.

¿Tzeʼn sela t-xnaqʼtzbʼil Jesús toj twitza? Jaku tzʼel qnikʼ tiʼj nim tiʼchaq tbʼanel kyaj tqʼamaʼn Jesús toj Tuʼjil Tyol Dios.