STORJA 95
Kif Jgħallem Ġesù
ĠURNATA waħda Ġesù jgħid lil wieħed raġel li għandu jħobb lill-proxxmu tiegħu. Ir-raġel isaqsi lil Ġesù: ‘Min hu l-proxxmu tiegħi?’ Ġesù jaf x’inhu jaħseb dan ir-raġel. Ir-raġel jaħseb li n-nies li huma tal-istess razza u reliġjon bħalu biss huma l-proxxmu tiegħu. Allura ejja naraw x’jgħidlu Ġesù.
Xi kultant Ġesù jgħallem billi jgħid storja. U hekk jagħmel issa. Jgħid storja dwar raġel Lhudi u raġel Samaritan. Aħna diġà tgħallimna li ħafna mil-Lhud ma jħobbux lis-Samaritani. Mela, din hi l-istorja taʼ Ġesù:
Jum wieħed kien hemm Lhudi nieżel minn triq fil-muntanji lejn Ġeriko. Imma qabżu fuqu xi ħallelin. Ħadulu l-flus u sawtuh sakemm kien kważi mejjet.
Wara ftit, għadda mit-triq qassis Lhudi. Hu ra lir-raġel imsawwat. X’taħseb li għamel? Qasam għan-naħa l-oħra tat-triq u baqaʼ għaddej. Imbagħad, għadda raġel ieħor reliġjuż ħafna. Kien Levita. Waqaf? Le, lanqas hu ma waqaf biex jgħin lir-raġel imsawwat. Tistaʼ tara lill-qassis u l-Levita fil-bogħod għaddejjin mit-triq.
Imma ara min hawn mar-raġel imsawwat! Hu Samaritan u qed jgħin lir-raġel Lhudi. Qed jidlek ftit mediċina fuq il-feriti tiegħu. Wara, jieħu lil-Lhudi f’post fejn jistaʼ jistrieħ u jfiq.
Wara li jispiċċa l-istorja tiegħu, Ġesù jgħid lir-raġel li staqsieh il-mistoqsija: ‘Liema minn dawn it-tlieta taħseb li ġab ruħu taʼ proxxmu mar-raġel imsawwat? Il-qassis, il-Levita, jew is-Samaritan?’
Ir-raġel iwieġeb: ‘Ir-raġel Samaritan. Kien qalbu tajba mar-raġel imsawwat.’
Ġesù jgħid: ‘Għandek raġun. Mela mur, u ttratta lil oħrajn bħalu.’
Ma jogħġbokx il-mod kif jgħallem Ġesù? Nistgħu nitgħallmu ħafna u ħafna affarijiet importanti jekk nisimgħu dak li jgħid Ġesù fil-Bibbja, hux veru?